Հունվարի 21-ին տեղեկացրել էինք, որ Բաղրամյան պողոտայում էլեկտրաէներգիայի սակագնի բարձրացման դեմ սեպտեմբերի 12-ի ցույցին մասնակցած Տիգրան Մազմանյանին աշխատանքից հեռացրել են: Այն ժամանակ Տիգրանը չցանկացավ հրապարակել իր աշխատանքի վայրի անունը:
Այսօր Aravot.am-ի հետ զրույցում Տիգրան Մազմանյանը նշեց, որ աշխատում էր Պաշտպանության նախարարության N զորամասում որպես պայմանագրային զինծառայող. «Ամեն ինչ սկսվեց, երբ պետք է 2015 թվականի նոյեմբերի 5-ին տեղի ունենար խաղաղ հավաք եւ երթ, իսկ երթի իրազեկումը ներկայացրել էի ես քանի որ ընկերս՝ Շահեն Հարությունյանը, անչափահաս է»:
Երթի Տիգրան Մազմանյանին իր մոտ է կանչել վերադաս հրամանատարը եւ զգուշացրել, որ իրենով հետաքրքրված են բարձրաստիճան անձինք ու առաջարկում են երկու տարբերակ, «կամ մնալ և շարունակել ծառայությունը, կամ հեռացվել աշխատանքից եւ զբաղվել իր ընտրած պայքարով: Որոշելու համար ունենալով 10 րոպե ժամանակ եւ հաշվի առնելով ներկայիս քաղաքական վիճակը մտածեցի, որ ես իմ պետությանը ավելի օգտակար կլինեմ իմ ծառայությամբ»:
Ակտիվիստին նաեւ զգուշացրել են, որ եթե այդ օրը ներկա գտնվի հավաքին, ապա կարող է նաև ձերբակալվել: «Այդ իսկ պատճառով ինձ «տարան» քաղաքից դուրս, որը բնականաբար իմ կամքին հակառակ չէր: Դեպքից անցնում է մոտ 2 ամիս: Մարտական հերթապահությունից վերադառնալուց հետո, արձակուրդիս ընթացքում զանգահարում են եւ կանչում զորամաս, որտեղ էլ ինձ են ներկայացնում իմ Ֆեյսբուքյան էջի գրառումներն ու լուսանկարները: Ինձ ասում են, որ ես հեղափոխության և հակապետական կոչեր եմ անում համացանցում»:
Կարդացեք նաև
Անդրադարձ է եղել նաեւ ընկերների, մասնավորապես՝ Շահեն Հարությունյանի հետ ունեցած լուսանկարներին. «Ասացին, թե Շանթի տղեն ա, հետը մոտիկ ես, խի ՞ ես դնում ես նկարը, ընչի ՞ ես էտի անում, հերոսություն՞ ես համարում: Խորհուրդ տվեցին զեկուցագիր գրել և ինքնակամ ազատվել աշխատանքից, որպեսզի չհեռացնեն»:
Տիգրանը գրել է զեկուցագիր, որը հաստատվել է ընդամենը 15 օրում. «Ընդհանրապես 30 օրում է լինում: Ուստի չեմ բացառում, որ իմ հեռացման հրամանը եկել էր ավելի վաղ, քան ես ներկայացրել եմ զեկուցագիրը: Ցանկանում եմ նշել, որ իմ հրամանատարությունը դժգոհ չէր իմ ծառայությունից եւ ցավում էին կատարվածի համար, բայց ինչպես ասում են կա հրաման, ուրեմն պետք է կատարվի»:
Աշոտ ԻՍՐԱԵԼՅԱՆ
