06.12.2015թ Սահմանադրության փոփոխությունների հանրաքվեի ժամանակ 8/20 ընտրատեղամասում այլ անձանց փոխարեն քվեարկություն կատարած 8/20 տեղամասի հանձնաժողովի անդամ Վարդանուշ Աթեյանն այսօր դատական նիստից հետո ասաց, որ հաջորդ ընտրություններին կաշխատի նորմալ ու «մաքուր ձեւով»:
Հիշեցնենք, որ Վարդանուշ Աթեյանին մեղադրանք է առաջադրվել քրեական օրենսգրքի 153 հոդվածով: Օգանովի 80 շ 30 բնակարանում հաշվառված անձանց տվյալների դիմաց գրառում կատարելու եւ նշված անձանց փոխարեն քվեարկելու համար:
«Գիտեի՝ այդ բնակարանի դուռը փակ է, մտածեցի՝ ինչի պետք է մնա ազատ, գրանցեմ, ստորագրեմ, ես մեղքը վերցնում եմ՝ գրել ու ստորագրել եմ»,- այսօր Մալաթիա-Սեբաստիա վարչական շրջանի ընդհանուր իրավասության դատարանում դատական նիստից հետո ասաց Վարդանուշը:
Հիշեցնենք, որ նա միջնորդեց դատարանին արագացված դատաքննության կարգով անցկացնել քննությունը: Իսկ դատարանը նիստը հետաձգեց, որ կողմերը հասցնեն պատրաստվել իրենց ճառերին: Հաջորդ դատական նիստը նշանակվեց փետրվարի տասնհինգին:
Կարդացեք նաև
Մեր հարցին, թե ինչու քվեարկեցիք ուրիշի փոխարեն, Վարդանուշ Աթեյանը պատասխանեց. «Քվեարկությունն անցկացնելու համար եմ ստորագրել»:
Մեր հարցին հրահա՞նգ էիք ստացել ձայներ ապահովելու, ասաց՝ ոչ:
Մեր հարցին՝ ինչու քվեարկեցիք ուրիշի փոխարեն, ասաց. «Հանուն իմ սկզբունքների: Ասացի՝ մեկ է, այստեղ չեն ապրում: Ոչ մեկն ուղղություն ինձ չի տվել: Այդ պահին մի քիչ էլ խառնաշփոթի մեջ էի, երեւի չհասկացա, գրեցի, ստորագրեցի»:
Տիկին Աթեյանն առաջին անգամ էր ընտրություններին մասնակցում՝ որպես հանձնաժողովական, իսկ հաջորդ տարի, նրա խոսքով, երեւի չի մասնակցի կամ էլ կմասնակցի ու կաշխատի «նորմալ, մաքուր ձեւով»: Նրանից հետաքրքրվեցինք՝ ուրիշի քվեն կեղծելիս պատասխանատվության մասին չէ՞ր մտածում, ասաց. «Այդքանը մտածեի, չէի անի նման բան»:
![IMG_1231[1]](https://www.aravot.am/wp-content/uploads/2016/02/IMG_12311.jpg)
Իսկ իշխող կուսակցությունից նկատողություն չստացա՞ք քվեները կեղծելու համար,տիկին Աթեյանի պաշտպան՝ փաստաբան Ժաննա Կետոյանը պատասխանեց. «Իր կատարած արարքի համար հերթը հասավ նրան, որ նստեց ամբաստանյալի աթոռին: Իրեն դուր է եկել սահմանադրական փոփոխությունները, զրուցել է կոլեգաների ու քաղաքացիների հետ, իրեն բացատրել են, որ շատ լավ տարբերակ է «այո»-ի տարբերակը ու եթե այն անցնի, երկրում շատ բան կփոխվի: Իմ պաշտպանյալն էլ իր սկզբունքներից ելնելով՝ որոշել է իր աջակցությունը դրսեւորել ինչ-որ ձեւով «այո»-ի բարեփոխումները անցկացնելու համար»:
Մեր հարցին՝ իսկ նյութական խոստումներ ստացե՞լ է, տիկին Կետոյանն ասաց՝ ոչ. «Եթե լիներ ինձ կասեր»:
Արփինե ՍԻՄՈՆՅԱՆ
