Փետրվարի 7-ը համացանցում հայատառ գրելու օրն է: Նախաձեռնության հեղինակը Կրթության եւ գիտության նախարարի մամուլի խոսնակ Զոհրապ Եգանյանն է: Նա «Peoplemeter» մամուլի ակումբում այսօր նախաձեռնության մեկնարկը «շատ տարերային» որակեց. «2012թ. փետրվարի 5-ին «Ֆեյսբուքում» գրառում կատարեցի` առաջարկելով փետրվարի 7-ը նշել որպես համացանցում հայատառ գրելու օր: Օգտատերերի եւ լրատվամիջոցների շնորհիվ առաջարկը մեծ արձագանք ստացավ եւ հաջորդ օրերին լրատվական հոսքերի թոփ-թեմաներից էր: Մինչ այդ պահը նման նախաձեռնության պահանջ կար եւ այսօր էլ առաջընթացը նկատելի է»:
Եգանյանը նշեց, որ նախորդ տարվանից բջջային օպերատորներից մեկը միացել է նախաձեռնությանը եւ բաժանորդներին կարճ հաղորդագրություններ է ուղարկում մեսրոպատառ հայերենով. «Մյուս օպերատորներին եւս կոչ եմ անում միանալ նախաձեռնությանը: Երեկ էլ տեսա, որ քաղաքապետարանը գովազդային վահանակի վրա փետրվարի 7-ը խորհրդանշող պաստառ էր տեղադրել, ինչի համար եւս շնորհակալ եմ:
Ի դեպ, երբ Արմեն Աշոտյանը արձակուրդների երկարաձգման մասին տեղեկացրեց, լրատվական կայքերը տեղադրեցին այդ գրառումը: Նյութերից մեկի տակ աշակերտները 120-ից ավելի հիացական գրառում էին կատարել, բոլորը՝ լատինատառ… միակ հայատառ մեկնաբանությունն իմն էր՝ այն էլ գրեցի՝ «աշակերտներ ջան, խնդրում եմ գրեք հայատառ»:
Ի դեպ, ինձ հայտնի լրատվական կայքերից միայն Aravot.am-ը եւ Hetq.am-ն են արգելում իրենց նյութերի տակ լատինատառ մեկնաբանություններ գրել»:
Կարդացեք նաև
Բանախոսը նաեւ տեղեկացրեց, որ նման նախաձեռնություն կյանքի է կոչվել նաեւ Վրաստանում եւ Իսրայելում, բայց Հայաստանն այս առումով առաջինն է. «Բայց Վրաստանում եւ Իսրայելում ցանցաբնակներն ավելի շատ են գրում իրենց մայրենիով, քան մենք»:
Զոհրապ Եգանյանի խոսքով՝ նախքան նախաձեռնությունը պետական մակարդակով կամ օրենսդրական ճանապարհով ամրապնդելը, պետք է այլ խնդիր լուծել. «Սա այն հարցն է, որը պետք է լուծել մեր գիտակցության մեջ: Վստահ եմ, որ որոշակի ժամանակ հետո ավելի լավ արդյունքներ ենք ունենալու, քան այս պահին է: Աշխարհը գնալով ավելի վիրտուալ է դառնում: Պատկերացրեք մի իրավիճակ, երբ երեխաները սկսում են դպրոց հաճախել եւ սովորել մեսրոպատառ հայերենը, բայց սոցցանցերում տեսնում են իրենց ծնողների լատինատառ գրառումները: Պատկերացնո՞ւմ եք այդ երեխաների հոգեվիճակը»:
Լուիզա ՍՈՒՔԻԱՍՅԱՆ
