Ձմռանը ցուրտը վնասում է մեր մաշկը, ուստի միայն խոնավացնող քսուքները բավարար չեն այն թարմ ու գեղեցիկ պահելու համար: Հարկավոր է պարբերաբար օգտագործել խոնավացնող, թարմացնող դիմակներ` հատկապես բանջարեղենային հիմքով:
Մաշկը թարմացնող, տոնուսավորող դիմակ կարող եք պատրաստել հում կարտոֆիլով, նուշով, կաթով եւ ձիթապտղի յուղով: 1 հում կարտոֆիլի խույսին ավելացնել մի քանի կաթիլ ձիթապտղի յուղ, 1 ճաշի գդալ թարմ կաթ եւ 1 թեյի գդալ նշի քերուկ:
Լավ խառնել եւ ստացված զանգվածը քսել դեմքին, պահել 20 րոպե, ապա լվացվել գոլ ջրով: Այնուհետեւ դեմքին քսել սնուցող դիմաքսուք:
Մաշկի թառամության դեմ շատ օգտակար է, երբ պարբերաբար օգտագործեք գազարի քերուկի դիմակներ: Գազարը քերիչով մանր քերել, դնել դեմքին, պահել 15-20 րոպե, ապա լվացվել գոլ ջրով: Որից հետո քսել փափկացնող դիմաքսուք: Կամ մաքրած, թարմ, ջրալի գազարը քերել, խառնել լավ հարած ձվի սպիտակուցի հետ, ավելացնել մի քիչ ալյուր, որպեսզի ստացվի խյուս: Քսել դեմքին ու պարանոցին, պահել 15-20 րոպե, որից հետո լվացվել եւ դեմքին քսել սնուցող դիմաքսուք: Այս դիմակը պետք է դնել շաբաթը 2-3 անգամ:
Կարդացեք նաև
Կարող եք երիտասարդեցնող դիմակ պատրաստել նաեւ կաղամբով: Թարմ կաղամբը կտրատել, եփել կաթով, դարձնել խյուս եւ մի քիչ հովացնելուց հետո քսել դեմքին: Պահել 20 րոպե: Կամ թարմ կաղամբի տերեւների վրա լցնել եռման ջուր, փափկելուց հետո թաթախել բուսական յուղի մեջ` նախընտրելի է ձիթապտղի, ապա դրանցով ծածկել դեմքն ու պարանոցը: Պահել 20 րոպե, լվացվել գոլից մի փոքր տաք ջրով:
Իսկ եթե ցանկանում եք ձեր դեմքը լինի նուրբ եւ թավշյա եւ փոքր ինչ սպիտակ, ապա կարող եք փորձել մաղադանոսով դիմակ:
1 Ճաշի գդալ մանր կտրատած թարմ մաղադանոսի վրա լցնել 1 բաժակ եռման ջուր եւ թրմել մի քանի ժամ: Այս եփուկով դեմքը մաքրել առավոտյան եւ երեկոյան` 1-2 ամիս շարունակ: Մաղադանոսը նաեւ վերացնում է դեմքի պեպենները:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
06.02.2016
