Ռուսաստանի փոխվարչապետ Դմիտրի Ռոգոզինը, որը կառավարությունում ղեկավարում է պաշտպանական-արդյունաբերական համալիրը, «հումորային» է համարում Հարավային Կորեայի հետախուզության այն տեղեկությունը, որ Ռուսաստանն է մասեր տրամադրել Հյուսիսային Կորեայի կողմից արձակված հրթիռի համար:
«Հարավային Կորեայի հետախուզության հայտարարություններն իրենց անեկդոտային բովանդակությամբ վերջին շրջանում, գնալով ավելի շատ, սկսել են հիշեցնել «Հայկական ռադիոն»,- գրել է Ռոգոզինը Twitter-ի իր միկրոբլոգում:
Ավելի վաղ Հարավային Կորեայի իշխող կուսակցության ներկայացուցիչ Լի Չխոլ Վուն, վկայակոչելով հետախուզության տվյալները, հայտարարել էր, որ օրերս Հյուսիսային Կորեայի արձակած հրթիռի առանցքային դետալները տրամադրել է Ռուսաստանը:
Պատրաստեց՝ Վիկտորյա ԱՆԴՐԵԱՍՅԱՆԸ
