Հայաստանի հունահռոմեական ըմբիշները այս տարի արդեն մասնակցել են միջազգային երկու մրցաշարի ու բավականին հաջող բացել մեդալների հաշվարկը:
«Առավոտը» ազգային հավաքականի գլխավոր մարզիչ Լեւոն Ջուլֆալակյանի հետ զրուցեց մրցաշարջան 2016-ի առաջին արդյունքների, առաջիկա ծրագրերի եւ օլիմպիական խաղերին մասնակցելու հեռանկարների մասին:
-Մեր հունահռոմեական ըմբիշները հունվար ամսին արդեն հասցրել են հանդես գալ երկու միջազգային մրցաշարերում: Գո՞հ եք մասնակցությունից:
-Ամեն տարի էլ մենք տարին լավ սկսում ենք ու լավ էլ ավարտում: Հույս ունեմ, որ 2016 թվականը բացառություն չի լինի:
Կարդացեք նաև
Հավաքականի ուսումնամարզական հավաքն սկսել էինք Երեւանում, հունվարի 14-ից 28-ը, որի ավարտին ըմբիշները մեկնեցին Սոֆիա եւ Ստամբուլ: Բուլղարիայում նվաճեցինք 3 ոսկի, 2 արծաթ եւ 3 բրոնզ, իսկ Թուրքիայում՝ 1 ոսկի: Տղաների մասնակցությունից ընդհանուր առմամբ գոհ եմ:
-Իսկ մրցաշարերն ուժե՞ղ կազմեր էին հավաքել:
-Բուլղարիայի մրցաշարը ավանդաբար շատ ուժեղ կազմ էր ունենում եւ համարվում էր ուժեղագույններից մեկը, իսկ այս տարի համեմատական առումով միջին մակարդակ ուներ: Բայց դա ամենեւին էլ չի նսեմացնում մեր ըմբիշների հաղթանակները: Որոշ քաշային կարգերում, այնուամենայնիվ, կային աշխարհի չեմպիոններ ու մրցանակակիրներ: Մեզ համար կարեւոր էր, որպեսզի տղաները Եվրոպայի (Ռիգա, մարտի 10-13) առաջնությունից առաջ անցնեն մրցակցային փուլ եւ այդ մրցաշարերը նախապատրաստական կարեւոր շրջան էին նրանց համար:
Ստամբուլում, որտեղ ի տարբերություն Բուլղարիայի, այս անգամ ավելի ուժեղ թիմեր էին մասնակցում՝ յուրաքանչյուր քաշային կարգում կար 22-28 մարզիկ, հանդես եկավ Արսեն Ջուլֆալակյանը: Նա անցկացրած չորս գոտեմարտերում հաղթել է առանց մրցակիցներին միավոր տալու: Նայել եմ դրանց տեսագրությունները: Որակով գոտեմարտեր է արել: Դա կարեւոր էր նախամեկնարկային այս փուլում:
-Իսկ Արսենի մրցակիցների մասին ի՞նչ կասեք:
-Հաջորդաբար հաղթել է բելառուսին, վրացուն, զրղըզին, եզրափակչում կրկին Վրաստանի ներկայացուցչին: Բոլոր երկրներն էլ աշխարհում ուժեղագույնի ճանաչում ունեն, իսկ մրցակիցները աշխարհի ու Եվրոպայի մրցանակակիր տղաներ են եղել: Ինչ վերաբերում է Արամ Ջուլֆալակյանին, նրանց ուղեկցող մարզչի ասելով, նա տակտիկական սխալ էր թույլ տվել: Պարտվելով 2:4 հաշվով՝ Արամը գոտեմարտը վերադարձնելու հնարավորություն ունեցել է, բայց չի կարողացել:
– Այս տարի երեք վարկանիշային մրցաշար կա: Ե՞րբ են դրանք կայանալու եւ ի՞նչ ակնկալիքներ ունեք:
-Դրանք սկսվում են ապրիլի կեսերից եւ ավարտվելու են մայիսի 8-ին: Առաջինը լինելու է Սերբիայում, ապրիլի 13-18-ը, երկրորդը՝ Մոնղոլիայում, ապրիլի 20-22-ը, երրորդը՝ Թուրքիայում՝ մայիսի 6-8-ը: Հիմա ըմբիշները կրկին ուսումնամարզական հավաքներում են Երեւանում: Ընդորում, խնդրել եւ այս պահին մերոնց հետ համատեղ ուսումնամարզական հավաք են անցկացնում Բուլղարայի եւ Շվեյցարիայի հավաքականները:
Մենք այսօրվա դրությամբ երկու ուղեգիր ունենք եւ պայքարելու ենք եւս չորս վարկանիշի համար:
ԱՇՈՏ ՀԱԿՈԲՅԱՆ
«Առավոտ» օրաթերթ
05.02.2016
