«Բացարձակապես նման խնդիր չկա»,-այսօր կառավարության նիստից հետո պատասխանելով հարցին, թե գուցե միայն ռուսական ընկերությունից գնելն ու մենաշնորհն է պատճառը, որ բենզինի գինը չի իջնում՝ ասաց Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը:
Նրա խոսքերով, 2006 թվականից սկսած, 5-6 ներկրողներ կան այս շուկայում եւ բացի Ռուսաստանի Դաշնությունից, նաեւ այլ երկրներից է ներկրվում, օրինակ` Ռումինիայից, Բուլղարիայից. «Բացարձակապես չի նշանակում, որ ամբողջությամբ Ռուսաստանի Դաշնությունից է ներկրվում: Դա տնտեսվարողների բիզնես-որոշումն է»:
Հարցին, թե քանի տոկոսն է այլ երկրներից ներկրվում Արտակ Շաբոյանն ասաց, որ այս պահին չի կարող վիճակագրություն ներկայացնել. «Բացարձակապես սահմանափակումներ չկան, կան խմբաքանակներ, որ ներկայումս էլ, նախկինում էլ ներկրվել են Արեւելյան Եվրոպայի երկրներից»:
Պարոն Շաբոյան ասաց, որ մրցակցության պաշտպանության մարմնի հիմնական խնդիրն է տեսնել տվյալ ոլորտում մուտքի սահմանափակումներ, մուտքի խոչընդոտներ կա՞ն թե` ոչ. «Մեր ուսումնասիրության արդյունքներով, այս ոլորտում չկան որեւէ խոչընդոտներ, սահմանափակումներ»:
Կարդացեք նաև
Արտակ Շաբոյանն ասաց, որ հանձնաժողովը բենզինի շուկայում գնային չարաշահման երեւույթներ չի տեսնում: Ըստ նրա, եթե որեւէ գործարար ցանկանում է զբաղվել բենզինի բիզնեսով, ապա կարող է զբաղվել եւ որեւէ խոչընդոտ չկա:
Մանրամասները` տեսանյութում
Լուսինե ԲՈՒԴԱՂՅԱՆ
