«Գյուղատնտեսության ոլորտին երկիր մտած վարկերի ընդամենը 8%-ն է ուղղվել, այն դեպքում, երբ գյուղատնտեսությունը ՀՆԱ-ի 20%-ն է կազմում: Գոնե վարկերի 20%-ը տայինք այս ոլորտին: Այն միակ ոլորտն է, որ տնտեսական աճ է ապահովում արդեն: Հանցավոր է նման քիչ գումարներ ներդնել գյուղատնտեսության մեջ»,- «Հայելի» ակումբում հայտարարեց Ազգային ժողովի ԲՀԿ խմբակցության պատգամավոր Լյովա Խաչատրյանը:
Ըստ Լյովա Խաչատրյանի՝ այս ոլորտն ավելի զարգացնելու համար վերամշակող ընկերություններին պետք է էժան կամ անվճար վարկեր տրամադրել. «Նրանք սոցվճարներով, հարկերով, աշխատատեղերով այդ ամեն ինչը կփակեն: Ընդհանուր օգուտն ավելի շատ կլինի: 8%-ը տվել ենք գյուղատնտեսությանը, մնացածը չգիտեմ ինչ ենք արել: 3 հատ ճանապարհ ենք ասֆալտել, որը հեսա կքանդվի»:
ԱԺ ՀՀԿ խմբակցության պատգամավոր Լեռնիկ Ալեքսանյանն էլ կարծում է, թե գյուղատնտեսությունն այն ոլորտն է, որը քիչ է ենթարկվում տնտեսագիտական օրինաչափություններին. «Գյուղատնտեսության վրա մեծ ներդրումներ պետք է կատարվեն: Բայց գյուղացին վարկը վերցնում է, արդյունք չի ստանում կամ ստանում է, չի կարողանում իրացնի եւ մնում է վարկի տակ: Սրանք անհատական վարկեր են, որոնք արդյունավետ չեն, քանի որ ռիսկային են»:
Ըստ նրա՝ գյուղատնտեսական ինքնարժեքը մեծ է՝ համեմատած այլ երկրների հետ. «Որակն էլ կամաց-կամաց ցածրանում է: Ազատ շուկայական հարաբերություններ են հիմա: Ինչո՞ւ պետք է դրսից, ասենք, լոլիկ չգա: Մերը մրցունակ չի դրսում եւ ներսում: Խորքային խնդիրներ պետք է լուծենք, որպեսզի գյուղատնտեսությունը ռելսերի վրա դնենք»:
Կարդացեք նաև
Աշոտ ԻՍՐԱԵԼՅԱՆ
