Վարչապետ Հովիկ Աբրահամյանը կառավարության այսօրվա նիստում անդրադարձավ գազի գնի հարցին՝ հայտարարելով, որ ՀՀ տնտեսվարողների համար էական է իրենց արտադրանքի մրցունակությունը չխաթարող էներգակիրների գինը. «Մենք շահագրգռված ենք, որ հանրապետության էական ենթակառուցվածք հանդիսացող «Գազպրոմ Հայաստան» ընկերությունը լինի կայուն եւ խելամտորեն շահութաբեր: Սակայն տնտեսության եւ բնակչության համար եւս պետք է գները լինեն մատչելի ու շահավետ:
Գազի սպառման ծավալների նվազումը ակնհայտորեն վկայում է, որ ընկերությունը կարող է ունենալ ավելի մեծ հասույթներ ավելի ցածր գների դեպքում: Կարծում եմ, որ «Գազպրոմ Հայաստան» ընկերության ղեկավարությունը մեծ անելիք ունի՝ այս բիզնես տրամաբանությունը հանրությանը եւ իր վերադասին ներկայացվելու գործում, ինչի արդյունքում թե՛ «Գազպրոմի», թե՛ Ռուսաստանի Դաշնության համար հստակ կդառնա մեր բանակցային առաջարկի փոխշահավետ բնույթը»:
Հովիկ Աբրահամյանի խոսքերով, համաշխարհային տնտեսության ու աշխարհաքաղաքական զարգացումներով պայմանավորված՝ ակնհայտ է գազի գնի իջեցման ոչ միայն անհրաժեշտությունը, այլեւ հնարավորությունը:
Լուսինե ԲՈՒԴԱՂՅԱՆ
