Միացյալ Նահանգների նախագահ Բարաք Օբաման նախատեսում է զգալիորեն ընդլայնել երկրի ռազմական ներկայությունը Կենտրոնական և Արևելյան Եվրոպայի ՆԱՏՕ-ի անդամ երկրներում՝ քառապատկելով այդ նպատակին ուղղված բյուջետային միջոցները:
Նախաձեռնության նպատակը «տարածաշրջանում ռուսական ագրեսիայի առավելագույնս զսպումն է»: Այս մասին Վաշինգտոնում հայտարարել է ԱՄՆ-ի պաշտպանության նախարար Էշթոն Քարթերը: Սպիտակ տունը ծրագրում է 2017 թվականին լրացուցիչ ռազմական սարքավորումների համար վճարել ավելի քան 3 միլիարդ 400 միլիոն դոլար: Ընթացիկ տարվա բյուջեով ռազմական ծախսերին հատկացվել է 789 միլիոն դոլար: Նախատեսվում է, որ անհրաժեշտության դեպքում նոր սարքավորումները կօգտագործեն ամերիկյան և ՆԱՏՕ-ի ուժերը:
«Մենք ուժեղացնում ենք մեր դիրքերը Եվրոպայում՝ սատարելով ՆԱՏՕ-ի մեր դաշնակիցներին՝ ընդդեմ ռուսական ագրեսիայի: Մենք ամրապնդում ենք դիրքերը՝ ընդդեմ ռուսական ագրեսիայի», – ասել է Միացյալ Նահանգների պաշտպանության նախարարն ու հավելել՝ նախընթաց 25 տարիներն այդ մասին չեն մտածել, իսկ հիմա արդեն որոշել են դիմել նման քայլի: «Այսօրվա անվտանգության միջավայրը դրամատիկ կերպով տարբերվում է 25 տարի առաջ եղածից, և դա պահանջում է նոր մտածելակերպ ու նոր գործելաոճ»,- հայտարարել է Քարթերը: Ըստ նրա, Միացյալ Նահանգների զինուժն առաջիկա տարիներին կդրսևորի մի վարքագիծ, որը կտարբերվի նախորդ տարիներին Աֆղանստանում և Իրաքում դրսևորված վարքագծից:
Մանրամասներին կարող եք ծանոթանալ` «Ազատություն» ռ/կ-ի կայքում
