Այսօր ԱԺ նիստում ՀՀ տրանսպորտի եւ կապի փոխնախարար Արթուր Առաքելյանը ներկայացրեց այն վարկային համաձայնագիրը, որով նախատեսվում է Վերակառուցման եւ զարգացման միջազգային բանկից վերցնել 40 մլն դոլար վարկ:
Վարկով նախատեսվում է կենսական նշանակության ճանապարհային ցանցը բարելավել, գյուղական համայնքները կապել միջպետական ճանապարհների հետ եւ այդ տարածքների բնակիչների համար ապահովել ելք դեպի հիմնական շուկա:
Փոխնախարարը, պատասխանելով ԲՀԿ պատգամավոր Վահան Բաբայանի հարցին, վստահեցրեց, որ բոլոր մարզերին գումարները կհասնեն եւ արդյունքը տեսանելի կլինի:
Արթուր Առաքելյանը հայտարարեց, որ կառուցված ճանապարհներին դժբախտաբար գողություն շատ է լինում. «Շատ են գողությունները: Էդ նշանները օգտագործում են չգիտեմ ինչի՝ կենցաղային խնդիրներ լուծելու համար: Հյուսիս-Հարավ ճանապարհի վրա հենց տեղադրվում էին էլեկտրական ազդանշան տվող սարքերը՝ հաջորդ օրը դրանք բացակայում էին, փորձում էինք լուծումներ տալ: Եվ նշաններն էին գողանում»:
Կարդացեք նաև
Վահան Բաբայանը զարմացավ՝ ի՞նչ է նշանակում ճանապարհային անվտանգության նշանները գողանան: Վահան Բաբայանը դժգոհեց, որ մեր ճանապարհային նշանները կարծես միայն մեզ համար են, դրսից երբ մարդ է գալիս, այդ նշաններով դժվար է կողմնորոշվել: Փոխնախարարն ընդունեց դիտողությունը՝ այդ ուղղությամբ ունենք անելիք:
Հռիփսիմե ՋԵԲԵՋՅԱՆ
