ԱԺ-ում «Քաղաքային կայուն զարգացման ներդրումային ծրագիր-Ծրագիր 2»-ը ֆինանսավորելու համար վարկային համաձայնագրի քննարկման ժամանակ Վանաձորից ընտրված պատգամավոր Էդմոն Մարուքյանը բողոքեց մարզերի նկատմամբ խտրական վերաբերմունքից: Հիշեցնենք, որ այդ համաձայնագրով նախատեսվում է 112 մլն դոլար վարկ վերցնել Ասիական զարգացման բանկից, որը ծախսվելու է մայրաքաղաքի ճանապարհների համար::
Պարոն Մարուքյանի խոսքերով՝ «Մի կողմից ասում են՝ արտագաղթ կա, բա ո՞նց անենք, որ մարդիկ ապրեն գյուղերում, աշխատանք չկա, մի կողմից էլ բոլոր միջոցները կենտրոնացած են մայրաքաղաքում: Պետական կառավարման համակարգն այնպիսին է, որ կենտրոնացված քաղաքականություն է վարվում: Եվ դա հետսովետական պրոբլեմ է: ՌԴ-ում էլ անընդհատ խոսում են Մոսկվան բեռնաթափելու մասին, շրջաններում ծայրահեղ վիճակ է: Եթե վարկային հնարավորություններ կան, դրանից պետք է օգտվեն նաեւ մյուս քաղաքները: Այդ պետական կառավարման պատճառով է, որ բնակչության 1/3-ը կենտրոնացած է Երեւան քաղաքում: Եվ դա ոչ մի լավ բանի մասին չի խոսում: Հիմա վարկ եք վերցնում ճանապարհների համար, երբ Գյումրիում ու Վանաձորում մարդիկ տնակներում են ապրում: Դե վարկեր վերցրեք՝ էդ մարդկանց տնակների հարցը լուծելու համար»:
Հետո Էդմոն Մարուքյանը դժգոհեց, որ խորհրդատվության համար 13 մլն դոլար է նախատեսվում. «Ասում ենք՝ բա ինչի՞ 13 մլն դոլար, ասում եք՝ մարդիկ փորձ չունեն, պետք է վերապատրաստվեն, որ այդ ծրագիրն իրականացնեն: Նույն խորհրդատվության գումարները ներդրված են եղել Հյուսիս-Հարավ ծրագրում, ո՞նց եղավ, որ սկզբում 500 մլն էր, հետո դարձավ 1 մլրդ: Էդ 13 մլն-ը ի՞նչ խորհրդատվության փող է: Դուք ասեցիք՝ սա էն խորհրդատվության գումարը չի, որ դուք անընդհատ քննադատում եք, սա ուրիշ խորհրդատվության փող է: Ուրիշ խորհրդատվությունը ո՞րն է»:
Կարդացեք նաև
ԱԺ փոխխոսնակ Էդուարդ Շարմազանովը, արձագանքելով Մարուքյանի՝ քաղաքների համաչափ զարգացման մասին ելույթին՝ նրա մտածելակերպը որակեց գավառական. «Իբր թե իրենք մարզերի իրավունքների պաշտպանն են, եւ իբր թե մարզերում, որ վիճակը վատ է, մայրաքաղաքն է մեղավոր: Չի կարելի էդպես: Չի կարելի մեր երկրում բաժանում կատարել երեւանցի, գյումրեցի, ալավերդցի: Ես Ալավերդիից եմ, բայց այո, հայ ժողովրդի աչքի լույսը մայրաքաղաք Երեւանն է, ինչ-որ մեկի մոտ հարց կա՞: Մայրաքաղաք Երեւանը մեր բոլորի աչքի լույսն է, չի կարելի հակադրել: Եթե մարզերում ծրագրերը վատ են իրականանում, բերեք դրա մասին խոսենք, բայց չհամեմատենք մայրաքաղաքի ծրագրերը»:
Ըստ Շարմազանովի, առջեւում ընտրություններն են 2017-ի ու այս ամբիոնը պարզ է, որ պետք է օգտագործեն քարոզչության համար. «Բայց, սիրելիներս, չափ ու սահման կա ամեն ինչի: Ստեղ ամենավատը այդ գավառական մտածելակերպն է, որ մենք հակադրում ենք մարզերի շահը մայրաքաղաքի շահերի հետ: Ես Ալավերդիի բնակիչ եմ, հոգով-սրտով էլ լոռեցի եմ, բայց անչափ շատ սիրում եմ Երեւանը, հո՞րդ ես շատ սիրում, թե՞ մորդ, էդ մանկական խաղը վերջացրեք: Երեւանը տանենք մարզեր, էս ի՞նչ գավառական խոսակցություններ են: Չի կարելի էս դահլիճում գավառականություն ու պրիմիտիվություն քարոզել, թե ով որտեղից ա»:
Հռիփսիմե ՋԵԲԵՋՅԱՆ
