Երկու օր է՝ հանրությունը քննարկում, ավելի ճիշտ՝ փորձում է կռահել, թե ինչ էին նշանակում ԱԺ ՀՅԴ խմբակցության ղեկավար Արմեն Ռուստամյանի խոսքերը՝ ՀՀԿ-ի հեղինակազրկված լինելու մասին։
Իրականում բավական հեշտ բացատրություն ունի։ ՀՀԿ-ի եւ ՀՅԴ-ի միջեւ պաշտոնների բազար է ընթանում, որտեղ առավելագույնը պոկելու համար երբեմն նման հնարքների են դիմում։ Արմեն Ռուստամյանի խոսքերը թարգմանաբար նշանակում էին, որ եթե մեր պահանջները չկատարեք եւ մեր նշած պաշտոնները չտաք, ուրեմն մենք կարող ենք մի քանի օրով ընդդիմադիր դառնալ:
Հիմա, երբ, ըստ տարբեր տեղեկությունների, տեղի է ունեցել Սերժ Սարգսյան-Հրանտ Մարգարյան հանդիպումը, եւ այնտեղ բարիշել են պաշտոնների քանակի ու որակի վրա, Արմեն Ռուստամյանը ինչ-որ կերպ պետք է ՀՀԿ-ին նորից «ապահեղինակազրկեր», այսինքն՝ իր խոսքերի տակից դուրս գալ։
Դա էլ է հեշտ, եթե դուք աղմկահարույց հայտարարություն եք անում, ապա այն հերքելու ամենաարդյունավետ ձեւը մեղքը լրագրողների վրա բարդելն է։ Ինչն էլ երեկ արեց Արմեն Ռուստամյանը։ «Հեղինակազրկում բառը դարձրել են հիմնական խնդիր, դարձրել են հիմնական թեման քննարկումների, կտրել են կոնտեքստից, բովանդակությունից անջատել են եւ քննարկում են բոլորովին անկապ բան, ես բոլորովին այլ բան եմ ասել»։
Կարդացեք նաև
Իհարկե, այն լրագրողները, որոնց ներկայությամբ Արմեն Ռուստամյանը ՀՀԿ-ին վիրավորեց, առանց բացառության բոլորը բութ եւ անհասկացող են եղել, չեն ջոկել Ռուստամյանի խոսքերի իրական իմաստը, կոնտեքստը, ենթատեքստը, բոլորն էլ միտումնավոր հեղինակազրկում բառը հորինել են եւ ընդհանրապես, անկապ ժողովուրդ են։
Ավելի ուշ նույն Ռուստամյանը հայտարարեց, թե իրականում այն ամենը, ինչ ասել է ՀՀԿ-ի մասին՝ ուժի մեջ է։ Վաղն էլ կհայտարարի, թե լրագրողները կոնտեքստից կտրել են կոնտեքստից կտրված իր կոնտեքստը:
Մհեր ՂԱԼԵՉՅԱՆ
Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
