«Դեկտեմբերի 31-ի գիշերն Ազատության հրապարակում ոստիկանները բռնություն կիրառեցին քաղաքացիների նկատմամբ: Տեսանյութերում երեւում է, թե ինչպես են ոստիկանները հարվածում քաղաքացիներին, ինչպես է Գեղամ Խաչատրյանը հարվածում ՀՀ քաղաքացիներին: Փոխանակ ձերբակալելու Գեղամ Խաչատրյանին, քրեական գործ հարուցելու նրա նկատմամբ, ՀՀ ոստիկանությունը ձերբակալում է Գեւորգ Սաֆարյանին»,- այս մասին այսօր ցույցի ընթացքում հայտարարեց «Նոր Հայաստան» նախաձեռնության անդամ Գագիկ Եղիազարյանը:
«Նոր Հայաստան»-ի մի շարք անդամներ այս պահին հավաքվել են ՀՀ դատախազության դիմաց: Նրանք պահանջում են ազատ արձակել Գեւորգ Սաֆարյանին:
Գագիկ Եղիազարյանը նշեց, որ հունվարի 3-ին՝ ոչ աշխատանքային օրը, դատախազը կարողացավ մտնել դատարան եւ Գեւորգ Սաֆարյանի նկատմամբ կալանքը որպես խափանման միջոց կիրառելու որոշում ստանալ, «իսկ երբ պետք էր «Նոր Հայաստանի» 9 անդամների հաղորդումն ընդունել հանցագործության մասին, ոչ աշխատանքային օրեր էին: Հնարավոր չեղավ նամակ հանձնել»:
Ըստ նրա՝ դա խտրական վերաբերմունք է եւ ապացուցում է, որ Գեւորգ Սաֆարյանը քաղբանտարկյալ է: «Մենք ՀՀ դատախազությունից պահանջում ենք, որ այստեղ գա լիազոր ներկայացուցիչ, որը կունենա լիազորություններ մեզ բացատրություններ տալու եւ վերցնելու մեր պահանջները: Մենք երկու պահանջ ունենք. վերացնել Գեւորգ Սաֆարյանի նկատմամբ կալանքը որպես խափանման միջոցը, նրան ազատել կալանքից կամ փոխել խափանման միջոցը»:
Կարդացեք նաև
Երկրորդ կետով «Նոր Հայաստանի» անդամները պահանջում են պատասխանատվության ենթարկել ոստիկան Գեղամ Խաչատրյանին:
Աշոտ ԻՍՐԱԵԼՅԱՆ
