Aravot.am-ը ՀՀ ԿԳ նախարարության Նախնական եւ միջին մասնագիտական կրթության վարչության պետ Աշոտ Արշակյանից հետաքրքրվեց՝ ի՞նչ որոշում է կայացնելու նախարարությունը՝ Երեւանի էստրադային եւ ջազային արվեստի պետական քոլեջի` աշխատանքից ազատված տնօրեն Լեւոն Սահակյանի (լուսանկարում) վերաբերյալ, քանի որ քոլեջի ուսանողությունը նրան վերականգնելու խնդրանքով դիմել է ՀՀ նախագահին, վարչապետին եւ ԿԳ նախարարին:
«Դա ընդամենը խնդրանք է, բայց վերականգնել Լեւոն Սահակյանին չենք կարող, որովհետեւ նա աշխատանքից ազատվել է ԿԳ նախարարի հրամանով»,-ասաց պարոն Արշակյանը:
Մեր հարցին՝ չի՞ պատահում, որ որոշ հրամանները վերանայվեն, մանավանդ այս պարագայում քոլեջի ուսանողությունը շեշտել է, որ Լեւոն Սահակյանն իր պաշտոնավարման ընթացքում միշտ եղել է ուսանողի կողքին, ընդառաջել է` թե որպես տնօրեն, թե որպես դասախոս:
«Հրամանը վերանայման ենթակա չէ, պարոն Սահակյանն ազատվել է պարտականությունները չկատարելու կամ ոչ պատշաճ կատարելու համար; Այստեղ խոսքը չի գնում Լեւոն Սահակյան անձի որակների կամ մանկավարժական հմտությունների վերաբերյալ, խոսքը վերաբերում է Լեւոն Սահակյանի՝ տնօրենի պարտականությունների չկատարելուն»,-պատասխանեց պաշտոնյան:
Կարդացեք նաև
Գոհար ՀԱԿՈԲՅԱՆ
