ԱԺ-ում քննարկվում է ԱԺ-ի 2012-ի մայիսի 31-ի որոշման մեջ լրացում անելու եւ մարդու իրավունքների պաշտպանի պաշտոնում ընտրելու համար ՄԻՊ թեկնածու առաջադրելու կարգի մասին հարցը:
Պետաիրավական հարցերի հանձնաժողովի նախագահ Հովհաննես Սահակյանը ներկայացրեց նախագիծը, որով նախատեսվում է նոր Սահմանադրության համաձայն իրավասու հանձնաժողով սահմանել, որը պետք է ներկայացնի օմբուդսմենին: Ընդ որում, հանձնաժողովի յուրաքանչյուր անդամ պետք է իրավունք ունենա ներկայացնել մեկական թեկնածուի:
ՀԱԿ պատգամավոր Արամ Մանուկյանը դժգոհեց, որ «Մարդու իրավունքների եւ հիմնարար ազատությունների մասին կոնվենցիայի հարցն» էլ տվել են ԱԺ արտաքին հարցերի հանձնաժողովին, այնպիսի տպավորություն է, որ իրավասու հանձնաժողովից ուզում են հարցերը տանել ուրիշ տեղ. «Իսկ եթե էդ հանձնաժողովի նախագահը լիներ ՀՀԿ-ական, կարո՞ղ է թողնեիք, որ այս հարցը այնտեղ մնար: Մարդու իրավունքների երկու հարց տանում եք ուրիշ տեղ: Միտում կա՞ սրա տակ»:
Կարդացեք նաև
Գալուստ Սահակյանն արձագանքեց, որ որեւէ միտում չկա, պարզապես ԱԺ կանոնակարգ օրենքով այդ հարցերը տրված են Պետաիրավական հանձնաժողովին: Նա ասաց, որ իրենց համար որեւէ վտանգ չկա. «Հենց հիմա կարող եմ 10 հոգու հրամանագրել, գնան Մարդու իրավունքների հանձնաժողով: Ուզում եմ ասեմ՝ վտանգներ չկան, պարզապես Պետաիրավականը պետք է անի»:
Նա նաեւ հիշեցրեց, որ անկախ հանձնաժողովների քննարկումներից, դեռ լիագումար նիստում պետք է քվեարկվի, իսկ այստեղ իրենք հո մեծամասնություն են:
Արամ Մանուկյանն էլ արձագանքեց, որ իհարկե, կարող են 15 հոգու էլ հրամանագրել ու անցկացնել ցանկացած թեկնածուի, բայց տպավորությունն այնպիսին է, որ Մարդու իրավունքների պաշտպանության հանձնաժողովին ուզում են մեկուսացնել:
Հովհաննես Սահակյանն էլ ասաց, որ այդ հարցադրումն արհեստական է. «Խոսքը վերաբերում է նոր Սահմանադրությամբ նախատեսված նոր իրավասությանը՝ մարմին ստեղծելու»:
Հռիփսիմե ՋԵԲԵՋՅԱՆ
