«Ինչպիսին կլինի համագործակցությունը, կլինի՞, թե՞ չի լինի, ցույց կտան հանդիպումները ձեր նշած քաղաքական ուժի հետ»,- փետրվարի 1-ին Ազգային ժողովում լրագրողների հետ ճեպազրույցի ընթացքում, անդրադառնալով ՀՀԿ-ՀՅԴ համագործակցությանը, ասաց Հանրապետական կուսակցության մամուլի քարտուղար Էդուարդ Շարմազանովը:
Նա հավելեց, որ պարզապես խնդրում է իր գործընկերներին զերծ մնալ զգացմունքային գնահատականներից. Զգացմունքային գնահատականից հետո երբեմն զղջում ես. «Ես այլեւս այդքան երիտասարդ չեմ եւ քաղաքականության մեջ փորձված եմ, որպեսզի այդ խայծը կուլ չտամ: Ես իմ բոլոր գործընկերներին, այդ թվում նաեւ իմ սիրելի, իմ հարգելի դաշնակցական Արմեն Ռուստամյանին կհորդորեմ երբեք զգացմունքային եզրույթներ չօգտագործել, որովհետեւ զգացմունքային եզրույթները այդքան էլ օբյեկտիվ չեն: Ես իրեն այդպես չեմ պատասխանի, բայց ես կասեմ, որ Հանրապետականը ունի վարկանիշ, Հանրապետականը ունի անելիք եւ Հանրապետականը պատրաստ է համագործակցության հանուն Հայաստանի Հանրապետության ավելի վառ ապագայի»:
Հիշեցնենք, որ փետրվարի 1-ին Արմեն Ռուստամյանը լրագրողների հետ զրույցում, անդրադառնալով Հանրապետական կուսակցության հետ համագործակցությանը, ասել էր, որ Հանրապետականը ցածր վարկանիշ ունի եւ համագործակցելով Հանրապետականի հետ Դաշնակցությունը կհեղինակազրկվի: Բայց հանուն փոփոխությունների Դաշնակցությունը պատրաստ է գնալ այդ քայլին:
Ամի ՉԻՉԱԿՅԱՆ
