Շիրակի մարզպետարանի մշակույթի ու սպորտի բաժնի պետ Վաչիկ Վարդանյանն Aravot.am-ի հետ զրույցում, անդրադառնալով Բուլղարիայի մայրաքաղաք Սոֆիայում Յան Կոլովի եւ Նիկոլա Պետրովի, ինչպես նաեւ Թուրքիայի Վեհդի Էմրեի եւ Համիթ Քափլանի միջազգային մրցաշարերում հունահռոմեական ըմբշամարտի Հայաստանի ազգային հավաքականի հաղթանակին, ասաց, որ գյումրեցիները պարծենալու իրոք մեծ առիթ ունեն: 4 ոսկե մեդալ նվաճած մարզիկներից երեքը գյումրեցիներ են. Արթուր Ալեքսանյանն ու Կարապետ Չալյանը Սոֆիայում դարձան չեմպիոններ, Թուրքիայում էլ՝ Արսեն Ջուլֆալակյանը: Փաստորեն չեմպիոններից միայն Միհրան Հարությունյանը Գյումրիից չէ:
« 4 չեմպիոններից 3-ը գյումրեցիներ են, բա չպարծենա՞նք: Իհարկե, Արսենը՝ որպես մարզիկ, հիմա հաշվառված է Երեւանում, բայց գիտենք որ հիմքը դրվել է Գյումրիում, Գյումրիում նույնպես հասել է հաջողությունների, հետո ընտանիքով տեղափոխվեցին Երեւան, բայց մեզ համար մնում է որպես գյումրեցի», -ասաց պաշտոնյան:
Ըստ նրա, սպասելի էր մեր հունահռոմեական ըմբիշների հաղթանակը: «Ասեմ ինչու էր սպասելի. արդեն երրորդ անգամ մեր մարզիկները մասնակցում են, խոսք Բուլղարիայի մայրաքաղաք Սոֆիայում Յան Կոլովի եւ Նիկոլա Պետրովի միջազգային մրցաշարի մասին է, այնտեղ անցած տարի եւս ունեցել ենք հաղթողներ, մրցանակակիրներ, Արթուր Ալեքսանյանն արդեն եռակի չեմպիոն է այդ մրցաշարի, իսկ Չալյան Կարապետն անցած տարի դարձավ մրցանակակիր՝ երրորդ մրցանակակիր էր:
Կարդացեք նաև
Ընդհանրապես, Հայաստանի հավաքական թիմի համար սա առաջին լուրջ մրցումն է, մրցաշրջանն էր 2016-ին, յուրահատուկ նախապատրաստական փուլ էր Ռիգայում անցկացվելիք Եվրոպայի առաջնության մասնակցության համար, քանի որ մարտի առաջին տասնօրյակին Ռիգայում Եվրոպայի առաջնությունն է: Երկու մասի էր բաժանվել Հայաստանի հավաքական թիմը՝ մեր մարզիկներից 8-ը մասնակցեցին Սոֆիայում, երկուսը՝ Ջուլֆալակյան եղբայրները, Թուրքիայում: Արդյունքներն իրոք սպասելի էին, քանի որ միջազգային մրցումների բազմակի փորձ ունեն մեր մարզիկները:
Նաեւ մեր հավաքական թիմի կազմում բոլորը տիտղոսավոր մարզիկներ են՝ աշխարհի, Եվրոպայի առաջնություններում մասնակցության բազում փորձ ունեցող: Երեւի ամենաերիտասարդն այս մրցումներում մեր ծանր քաշային Էդգար Խաչատրյանն է, որը նվաճեց Սոֆիայում բրոնզե մեդալ, իսկ մյուսները, ինչպես ասացի, Արթուրն արդեն երրորդ անգամ է մասնակցում, Չալյանը՝ նույնպես, Մաքսիմ Մանուկյանն ու Արթուր Շահինյանը 88 կիլոգրամ քաշային կարգում էլի այս մրցումների բազում փորձ ունեն: Իսկ արդեն Ջուլֆալակյան եղբայրների մասին խոսելն ավելորդ է, տիտղոսակիր Արսենը ու նրանից փոքրը՝ Արամը, որը ցավոք սրտի, պարտություն կրեց Թուրքիայում, եւ միակ մարզիկը, որը միջազգային այս մրցումներում մեդալ չնվաճեց, մյուսները գրեթե բոլորը մեդալներ նվաճեցին», -ասաց մեր զրուցակիցը:
Մեր դիտարկմանը, թե Թուրքիայում տարած հաղթանակը մի տեսակ ավելի ուրախացնող է, չէ՞, Վաչիկ Վարդանյանն ասաց. «Իհարկե, ե՛ւ Թուրքիայում, ե՛ւ մյուս տեղերում, երբ մեր մարզիկները մրցում են ադրբեջանցի ու թուրք մրցակիցների հետ, հաղթանակը մի այլ կերպ է ընդունվում, կարծես հաղթանակ անգամ երկուս լինի: Այս մրցումը շատ կարեւոր էր Արսենի համար, ինչպես գիտենք, նա անցած տարի ձախողեց, տարին սկսվում է հաղթանակով, տա Աստված նման կերպ շարունակվի, քանի որ Արսենի առջեւ լուրջ փորձություն է դրված. նա պետք է նվաճի օլիմպիական խաղերի մասնակցության վարկանիշ: Այդ մրցույթները անցկացվելու են Թուրքիայում, Մոնղոլիայում ու Սերբիայում»:
Նշենք, որ գյումրեցիներն առանձնակի հպարտությամբ են արձագանքում մեր մարզիկների հաղթանակին, «Գյումրին մեր տունն է» նախաձեռնող խմբի անդամները Գյումրու շենքերի պատերի վրա փակցրել են. «Գյումրիում մատների վրա հաշված մարդիկ են մնացել, օր ալամ աշխարհի չեմպիոն չեն դարձել»:
Նունե ԱՐԵՎՇԱՏՅԱՆ
