Այսօր, ի պատասխան Էդմոն Մարուքյանի հարցադրման, ԱԺ նախագահ Գալուստ Սահակյանն ասել էր, որ եթե ԱԺ ամբիոնը չքաղաքականացնեն, ավելի շատ օրենսդրական նախաձեռնություններ կհասցնեն քննարկել մեկ քառօրյայի ընթացքում:
Գալուստ Սահակյանի այդ առաջարկությունը՝ չքաղաքականացնել ԱԺ ամբիոնը, «շատ օրիգինալ» գնահատեց ՀԱԿ խմբակցության պատգամավոր Նիկոլ Փաշինյանը:
Նրա խոսքերով՝ ՀՀ-ն միակ երկիրն է հավակնում դառնալ աշխարհում, որտեղ քաղաքականությունը չքաղաքականացնելու կոչեր են հնչում:
Նիկոլ Փաշինյանն ասաց, որ վերջին 3 ամիսների ընթացքում՝ արձակուրդներին, եղել է ՀՀ շուրջ 50 գյուղերում եւ մտահոգություն հայտնեց, որ պաշտոնական վիճակագրությունը, նաեւ այն վիճակագրությունը, որ ներկայացում է ԿԲ-ն՝ կապված գյուղացիական վարկերի հետ, այնքան էլ իրականությանը չի համապատասխանում: Բազմաթիվ գյուղացիներ ստիպված են նոր վարկեր վերցնել՝ հին վարկերը փակելու համար. «Մարդկանց մեջ հարյուրավոր կոնֆլիկտներ են առաջացել միմյանց երաշխավոր լինելու հետեւանքները չգիտակցելու համար, եղբայրը՝ եղբոր, հարեւանը՝ հարեւանի: Այս իրավիճակն ավելի սրվել է, որովհետեւ բազմաթիվ մթերող ընկերություններ մինչեւ այժմ օբյեկտիվ եւ սուբյեկտիվ պատճառներով չեն կարողացել վճարել գյուղացիներին»:
Կարդացեք նաև
Նա առաջարկեց Գալուստ Սահակյանին, որ լսումներ հրավիրի, որպեսզի այս իրավիճակի մասին մանրամասն քննարկեն, որովհետեւ ցանկացած պահի սա կարող է պայթել՝ որպես ճգնաժամ:
Հռիփսիմե ՋԵԲԵՋՅԱՆ
