«Հայաստանի Հանրապետական կուսակցության այսօրվա նիստի ընթացքում քննարկվել են ներքաղաքական, ներկուսակցական, արտաքին քաղաքական հարցեր: Հիմնականում քննարկվել են Սահմանադրական բարեփոխումներից բխող՝ Ընտրական օրենսգրքի վերաբերյալ Հանրապետական կուսակցության տեսակետները»,- այս մասին այսօր ՀՀԿ Գործադիր մարմնի նիստից հետո լրագրողներին տեղեկացրեց Հանրապետականի մամուլի խոսնակ Էդուարդ Շարմազանովը:
Անդրադառնալով ՀՀԿ-Դաշնակցություն հնարավոր համագործակցության շուրջ ընթացող քննարկումներին, ասաց, որ իրենք համագործակցության կողմնակից քաղաքական ուժ են, դռները չեն փակում. «Այս համագործակցությունը պետք է լինի ծրագրային, գաղափարական: ՀՅԴ-ի հետ դեռեւս քննարկվում է համագործակցության ձեւաչափը: Միգուցե հաջորդ նիստից հետո ես որոշակի նոր զարգացումների մասին կխոսեմ, բայց այս պահին վերջնական որեւէ բան հստակեցված չէ»:
Նա ասաց, որ ՀՀԿ-ն դեռեւս վերջնական չի որոշել թե ում հետ պետք է համագործակցեն եւ ինչ ձեւաչափով: «Ինքնանպատակ կոալիցիաներ, ինքնանպատակ համագործակցություն չի կարող լինել: Համագործակցությունը պետք է լինի գաղափարական, ծրագրային եւ պատասխանատվության շրջանակներում»:
Աշոտ ԻՍՐԱԵԼՅԱՆ
