Խոսքի ազատության պաշտպանության կոմիտեի նախագահ Աշոտ Մելիքյանն այսօր «Հենարան» ակումբում ներկայացրեց կազմակերպության 2015թ. տարեկան զեկույցը` Հայաստանում խոսքի ազատության վիճակի և լրագրողների ու ԶԼՄ-ների իրավունքների մասին:
Ըստ ուսումնասիրության՝ 2015թ. գրանցվել է լրագրողների նկատմամբ ֆիզիկական բռնության 8 (նախորդ տարվա 9 դեպքի դիմաց), ճնշումների 67 (նախորդ տարվա 43 դեպքի դիմաց), տեղեկություններ ստանալու եւ տարածելու իրավունքի խախտման 30 դեպք (նախորդ տարվա 13 դեպքի դիմաց):
«Կոմիտեի 13 տարվա գործունեության ընթացքում երբեւէ նման հաստափոր՝ 82 էջանոց զեկույց չի եղել: Սա պայմանավորված է նրանով, որ բարդ եւ լարված ժամանակահատված էր լրագրողների համար՝ խոչընդոտներ, ֆիզիկական բռնություններ: Բավական է հիշել Բաղրամյան պողոտայում տեղի ունեցած իրադարձությունները, երբ ցույցը ցրելիս ոստիկանները բռնության ենթարկեցին լրագրողներին: Այդ միջադեպն աննախադեպ է իր ծավալներով: Ֆիզիկական բռնության է ենթարկվել 13 լրագրող եւ օպերատոր, 11-ի գործունեությունն էլ այլ կերպ է խոչընդոտվել, օրինակ՝ տեխնիկան կոտրելով»,- ասաց Աշոտ Մելիքյանը:
Նա համոզված է, որ նշյալ դեպքերի հիման վրա հարուցված քրեական գործերն ի վերջո կարճվելու են. «Ովքեր խոչընդոտում են լրագրողների գործունեությանը, համոզված են, որ պատասխանատվության չեն ենթարկվելու, դրա համար էլ ազատություն են տալիս ձեռքերին եւ լեզվին: Լրատվամիջոցները հետեւողականորեն չեն պայքարում իրենց իրավունքները պաշտպանելու համար: Հաճախ են ասում՝ ոչ ժամանակ ունենք, ոչ էլ հավես… Փաստորեն, գնալով խոչընդոտողները՝ պատգամավորները, իրավապահները շատ ավելի լկտիաբար են խախտում լրագրողների իրավունքները»:
Կարդացեք նաև
Մելիքյանը նկատել է, որ լրագրողներն «իմունիտետ» են ձեռք բերել եւ որոշ դեպքեր անգամ չեն դիտարկում որպես բռնություն. «Օրինակ՝ սահմանադրական հանրաքվեի օրը լրագրողներից մեկի հետ պատահած դեպքը: Այսինքն, տեսախցիկը ձեռքից վերցնելը եւ թափ տալը ֆիզիկական բռնություն չէ: Կարելի է ենթադրել, որ մինչեւ կապտուկներ չլինեն՝ բռնություն չի համարվի: Տասը տարի առաջ եթե լրագրողը ձայնագրիչն առաջ տաներ եւ նրա ձեռքին հարվածեին, դա ֆիզիկական բռնություն կդիտարկվեր: Ցանկացած սուր հարց պատասխան ունի, պետք չէ ձեռքով կամ մարմնի այլ մասերով խոչընդոտել լրագրողի աշխատանքը»:
Բանախոսի դիտարկմամբ՝ հունիսի 23-ին Բաղրամյան պողոտայում տուժած լրագրողների գործը կհասնի միջազգային տարբեր ատյաններ. «Մեր երկրի ներսում չկա ավանդույթ՝ լրատվամիջոցին խոչընդոտող անձին պատասխանատվության ենթարկելու: Անպատժելիության մթնոլորտը լրագրողների հանդեպ նոր հանցագործություններ է ծնում»:
Լուիզա ՍՈՒՔԻԱՍՅԱՆ
