«Բացարձակ ո՛չ, որ չունեմ առնչություն, ի՞նչ պատասխանեմ»,-այսօր Եռաբլուրում Նավասարդ արքեպիսկոպոս Կճոյանը «օֆշորի գործի» հետ կապված մեր հարցին որեւէ առնչություն ունե՞ք դրա հետ, այսպիսի պատասխան տվեց:
Լրագրողների բազմաթիվ հարցերին՝ բա որ առնչություն չունեք, ինչո՞ւ են ձեր անունը հոլովում, «Բենթլիի» ճակատագիրն ի՞նչ եղավ, ի՞նչ արեցիք այն «Բենթլին» եւ այլն՝ սրբազան հայրը պատասխանեց ժպիտով. «Շնորհավորում եմ Բանակի օրի առիթով, ուրիշ ասելիք չունեմ»:
Մենք հետաքրքրվեցինք՝ հետեւո՞ւմ եք դատավարությանը: Նա վստահեցրեց, որ՝ ոչ: Մեր դիտարկմանը, որ Ձեր անունն է հոլովվում, ախր Ձեր վարկն է, Ձեր հեղինակությունն է՝ նա արձագանքեց. «Դուք էլ եք հոլովվում»:
Հարցին՝ Ձեզ մեղադրում են, չե՞ք ուզում հակադարձել, եթե լռում եք, նշանակում է մեղավոր եք՝ նա պատասխանեց. «Ձեր հարցերին ես լուրջ չեմ վերաբերվում»:
Կարդացեք նաև
Երբ լրագրողները հարցրեցին՝ իսկ հանրության կարծիքը լուրջ չէ՞ Ձեզ համար՝ Նավասարդ Կճոյանը պատասխանեց. «Դու հանրության ներկայացուցիչ չես»:
Ի վերջո, նա ձեռքը օդում թափահարելով ու «ցտեսություն ձեզ» ասելով՝ փորձեց հեռանալ. «Դուք ինձ ձանձրացրիք, խելոք եղեք»:
Իր բիզնեսների հետ կապված հարցերին էլ արձագանքեց՝ եթե գտնես՝ նվիրում եմ քեզ:
Դիտարկմանը, որ սրբազան հայրերը պետք է ավելի հանդուրժող լինեն՝ նա այսպես պատասխանեց. «Ավելի հանդուրժող ինչպե՞ս եք պատկերացնում: Տոնի օրը եկել եք՝ առանց փաստերի հեքիաթներ եք պատմում»:
Մեր դիտարկմանը, որ քրեական գործ կա, որտեղ Ձեր անունն էլ է շոշափվում, վկաներ կան, որոնք դատարանում վկայություն են տվել, որ անձամբ Ձեզ տեսել են, որ Տիգրան Սարգսյանի անձնագիրը Դուք եք տարել Կիպրոս՝ նա պատասխանեց, որ քրգործն իր դեմ չէ եւ փաստեր չկան:
Լրագրողները արքեպիսկոպոսին դիմում էին՝ ինչպես ասես՝ էլ պարոն Կճոյան, էլ պարոն սրբազան, նա բարկացավ՝ ես պարոն Կճոյան չեմ:
Նա նստեց մեքենան եւ փորձեց հեռանալ՝ մաղթելով. «Շնորհավորում եմ բոլորիդ տոնը եւ բարի՛ եղեք»:
Հարցին՝ այս «Ռենջ Ռովերը Ձե՞րն է»՝ նա վստահեցրեց, որ՝ ոչ:
Հռիփսիմե ՋԵԲԵՋՅԱՆ
