2016-ին Գերմանիան ստանձնել է ԵԱՀԿ նախագահությունը: Այդ կապակցությամբ այսօր ԵԱՀԿ երեւանյան գրասենյակի ղեկավար, դեսպան Անդրեյ Սորոկինը եւ ՀՀ-ում Գերմանիայի Դաշնային հանրապետության արտակարգ եւ լիազոր դեսպան Մաթիաս Քիսլերը հրավիրել էին ասուլիս:
Aravot.am-ի հարցին՝ ընդդիմությունն ասում է, որ եվրոպական կառույցները, աչք փակելով ընտրությունների կեղծման դեպքերի վրա եւ դրանք հայտարարելով լեգիտիմ՝ դրանով հովանավորում են նախագահ Սերժ Սարգսյանին, Դուք ընդունո՞ւմ եք դա, արդյոք եվրոպական կառույցները սատարո՞ւմ են, որ կեղծվեն ընտրությունները՝ Մաթիաս Քիսլերը պատասխանեց. «Եթե հանրաքվեի մասին եք ասում, մենք դեռեւս սպասում ենք ԵԱՀԿ/ԺՀՄԻԳ-ի զեկույցին, որից հետո արդեն կկատարենք մեր եզրակացությունը: Մինչեւ այդ՝ դրա վերաբերյալ որեւէ բան չենք կարող ասել»:
Իսկ ԵԱՀԿ երեւանյան գրասենյակի ղեկավարը պատասխանեց. «ԵԱՀԿ-ն երբեք ընտրությունների լեգիտիմության վերաբերյալ չի հայտարարել, երբեք չի օգտագործել լեգիտիմ բառը: Մենք հստակ պարտավորություններ ունենք եւ դուք բոլորդ շատ լավ գիտեք խորհրդարանական, նախագահական ընտրությունների արդյունքների հետ կապված ԵԱՀԿ/ԺՀՄԻԳ-ը ինչ աշխատանքներ է իրականացրել: Նրանք փորձագիտական գնահատական են տալիս ընտրությունների հետ կապված, արդյունքներից ելնելով՝ ստանում ենք նաեւ պաշտոնական փաստաթուղթ, որտեղ հստակ առաջարկություններ կան թերությունների վերացման հետ կապված, որը տալիս է ԵԱՀԿ/ԺՀՄԻԳ-ը: Վերջին խորհրդարանական, նախագահական ընտրություններից հետո հիմանական պահանջներն ու խորհուրդները կատարվել են Հայաստանում»:
Հռիփսիմե ՋԵԲԵՋՅԱՆ
