ՀՀ Ազգային ժողովի փոխնախագահ, Հայաստան-Լատվիա, Լիտվա, Էստոնիա պատգամավորական բարեկամության խմբի ղեկավար Էդուարդ Շարմազանովը հունվարի 27-ին հեռախոսազրույցներ է ունեցել Լատվիայի Հանրապետության Սաեյմայի փոխխոսնակ, ԵԽԽՎ-ում Լատվիայի պատվիրակության ղեկավար Ինես Լիբինա-Էգների, Լիտվայի Հանրապետության Սեյմասի Լիտվա-Լեռնային Ղարաբաղ բարեկամության խմբի ղեկավար, ԵԽԽՎ-ում Լիտվայի պատվիրակության անդամ Դալիա Կուոդիտեի եւ Էստոնիայի Հանրապետության Ռիիգիկոգուի Էստոնիա-Հայաստան պատգամավորական բարեկամության խմբի ղեկավար Մատի Ռայդմայի հետ:
ԱԺ փոխնախագահը բարձր է գնահատել Բալթյան երկրների խորհրդարանականների վարքագիծը ԵԽԽՎ հունվարի 26-ի լիագումար նիստին «Բռնությունների աճը Լեռնային Ղարաբաղում եւ Ադրբեջանի մյուս գրավյալ տարածքներում», ինչպես նաեւ բոսնիացի պատգամավոր Միլիցա Մարկովիչի հեղինակած «Ադրբեջանի սահմանամերձ շրջանների բնակիչները միտումնավոր զրկված են ջրից» հակահայկական բանաձեւերի նախագծերին դեմ քվեարկելու հարցում:
Էդուարդ Շարմազանովը նշել է, որ խորհրդարանականների քվեարկությունը ցույց է տվել, որ կողմնակից են Լեռնային Ղարաբաղի հակամարտության խաղաղ կարգավորմանը ԵԱՀԿ Մինսկի խմբի ձեւաչափով եւ մերժում են Ադրբեջանի ապակառուցողական մոտեցումները:
ԱԺ փոխնախագահը Ինես Լիբինա-Էգների, Դալիա Կուոդիտեի եւ Մատի Ռայդմայի հետ հեռախոսազրույցներում վերահաստատել է Հայաստան այցելելու իր հրավերները:
Կարդացեք նաև
ՀՀ ԱԺ փոխնախագահ Էդուարդ Շարմազանովի աշխատակազմ
