Սկսած 2003 թվականից՝ Հայաստանը կոռուպցիայի ընկալման համաթվով (ԿԸՀ-ով) որեւէ փոփոխություն չի արձանագրել՝ ոչ առաջընթաց կա, ոչ էլ՝ հետընթաց: Այսօր այս մասին «Մեդիա կենտրոնում» ասաց «Թրանսփարենսի Ինթերնեշնլ» հակակոռուպցիոն կենտրոնի գործադիր տնօրեն Վարուժան Հոկտանյանը՝ ներկայացնելով «Հայաստանի 2015-ի կոռուպցիայի ընկալման համաթիվը» նոր զեկույցը:
Հոկտանյանի ներկայացմամբ՝ 2015 թվականից ԿԸՀ դասակարգման աղյուսակում ներառված է 168 երկիր, որոնց արժեքը չափվում է 0-ից 100 սանդղակով, որտեղ 0-ն նշանակում է, որ երկիրն ընկալվում է որպես բացարձակապես կոռումպացված, իսկ 100-ը՝ որպես բացարձակապես մաքուր:
Ըստ զեկույցի, Հայաստանում կոռուպցիայի ընկալման համաթիվը 2015-ին 35 է: 168 երկրների մեջ Հայաստանը 95-98 տեղերում է՝ կիսելով այն Ֆիլիպինների, Մալիի եւ Մեքսիկայի հետ: Նախկին խորհրդային երկրներից լավագույն արդյունքը, մի քանի տարի է, գրանցում է Էստոնիան: Այս երկիրը 23-26-րդ տեղերում է՝ Ֆրանսիայի, Քաթարի եւ ԱՄԷ-ի հետ: Մեր հարեւան երկրներից Վրաստանը կոռուպցիայի ընկալման համաթվով Հայաստանից լավ վիճակում է՝ վերջին մի քանի տարում, ինչպես ասաց Հոկտանյանը, չնայած տեղում դոփում է, բայց այս երկրի կոռուպցիայի ընկալման համաթիվը 52 է:
Հայաստանը Եվրասիական տնտեսական միության երկրների մեջ Ռուսաստանից եւ Բելառուսից ավելի լավ վիճակում է:
Կարդացեք նաև
Իսկ Թուրքիան Հայաստանից լավ վիճակում է կոռուպցիայի ընկալման համաթվով, այս երկրի միավորը 45 է, Ադրբեջանը Հայաստանից վատ վիճակում է. կոռուպցիայի ընկալման համաթիվը 29 է, Իրանինը՝ 27:
Պարոն Հոկտանյանի խոսքերով՝ ընդհանրապես կոռուպցիան լուրջ խոչընդոտ է երկրի զարգացման համար, եւ տնտեսական եւ քաղաքական համակարգերը լուրջի ռիսկի տակ են գտնվում:
Նոր ստեղծված կոռուպցիայի դեմ պայքարի խորհրդի վերաբերյալ էլ Հոկտանյանը նկատեց, որ միամիտ է կարծել, թե մի խորհրդով կարելի է նվազեցնել կոռուպցիան. «2004-ին էլ եղել է այդպիսի մի խորհուրդ, հիմա դրա ճարտարապետությունը փոխվեց, բայց առանձնապես հաջողություններ պետք չէ ակնկալել: Խորքային բարեփոխումներ են պետք, ոչ թե իմիտացիա: Պետք է լինեն տնտեսական, քաղաքական արմատական բարեփոխումներ»:
Հոկտանյանն ասաց, որ կոռուպցիայի դեմ պայքարում եթե լինի քաղաքական կամք, կկատարվեն որոշակի քայլեր, որոնք կապահովեն կոռուպցիայի նվազումը. «Պետք է լինի դեմոնոպոլիզացիա՝ քաղաքական եւ տնտեսական կյանքում: Միջազգային կազմակերպություններն են արձանագրել, որ Հայաստանում մոնոպոլիզացիան բարձր աստիճանի է: Սա նշանակում է տնտեսական մրցակցության խաթարում: Մոնոպոլիան եւ կոռուպցիային իրար հետ ձեռք ձեռքի տված են լինում միշտ»:
Ըստ Հոկտանյանի, քաղաքական եւ գործարար վերնախավի սերտաճումը մեր երկրում լուրջ խնդիր է, այն վնաս է հասցնում, եւ թույլ չի տալիս կոռուպցիան նվազեցնել:
Ըստ «Թրանսփարենսի Ինթերնեշնլ»-ի կատարած՝ կոռուպցիայի ընկալման բարոմետրի հետազոտության, մեր հասարակությունն էլ խորը ապատիայի մեջ է, անտարբեր է կոռուպցիայի դեմ պայքարում. հարցմանը՝ կուզեիք ներգրավվել կոռուպցիայի դեմ պայքարում, հարցվածների կեսից ավելին ասել է՝ ոչ:
Մինչդեռ, ինչպես նկատեց Հոկտանյանը, կոռուպցիայի դեմ պայքարում, հասարակության ճնշումն էլ շատ կարեւոր է:
Նելլի ԲԱԲԱՅԱՆ
