2016 թ. հունվարի լույս 27-ի գիշերը, ժամը 1.15-ին, ոստիկանության Կենտրոնականի բաժին հեռախոսային ահազանգով դիմած քաղաքացի Թինա Ն. -ն հայտնել է, որ Ազատության հրապարակում, Թումանյանի արձանի մոտ տեղադրված վրանում, մի խումբ անձինք օգտագործում են ոգելից խմիչքներ և բարձրաձայն հայհոյում:
ՀՀ ոստիկանությունը միջոցներ է ձեռնարկել ահազանգով ստացված տեղեկությունները ստուգելու նպատակով: Վարչական զննությամբ պարզվել է, որ «շուրջօրյա հավաքի» մասնակիցները հասարակական վայրում օգտագործում են ոգելից խմիչքներ:
«Վարչական իրավախախտումների վերաբերյալ» ՀՀ օրենսգրքի 175 հոդվածի 1-ին մասով նախատեսված իրավախախտում կատարելու կասկածանքով վարչական կարգով ոստիկանության Կենտրոնականի բաժին են բերվել յոթ անձինք, որոնցից երկուսը՝ անչափահաս աղջիկներ:
Հարուցվել է վարչական վարույթ:
Իրավախախտման վայրից վերցվել են 20 սմ երկարությամբ շեղբով ծալովի դանակ, օղու 3 և վիսկիի 1 կիսադատարկ շշեր:
Կարդացեք նաև
Պարզվել է նաև, որ բերվածներից մեկը նախկինում դատապարտված է եղել և ներկայումս գտնվում է քրեական հետապնդման մեջ՝ գողություններ կատարելու մեղադրանքով:
Անչափահաս աղջիկներից մեկը կողոպուտ կատարելու կասկածանքով նույն օրը բերման էր ենթարկվել ոստիկանություն, կողոպուտի առարկա հեռախոսը առգրավվել էր: Հարուցված է քրեական գործ: Քրեական հետապնդման մարմնի կողմից ստորագրությամբ ազատ արձակվելուց հետո նա անմիջապես միացել էր հավաքի մասնակիցներին:
Բոլոր բերվածներն այս պահի դրությամբ ազատ են արձակվել: Սակայն իրավիճակն արմատական փոփոխության կարիք ունի: Ակնհայտ է, որ «շուրջօրյա հավաքի» վայրը վերածվել էր մի տարածքի, որ իրեն էր ձգում նաև հակահասարակական հակումներով անձանց:
Հիշեցնում ենք, որ Երևանի քաղաքապետի որոշումներով արգելված էր Ազատության հրապարակում կազմակերպվող հավաքների ընթացքում օգտագործել վրաններ: Ոստիկանությունը, սակայն, տևական ժամանակ դրսևորել էր հանդուրժողականություն՝ չխոչընդոտելով վրանատիպ ծածկոցի տեղադրմանը:
Հանրային վայրում իրավախախտումը նախականխելու նկատառումով ոստիկանությունն ապամոնտաժել է վրանատիպ ծածկոցը:
ՀՀ ոստիկանություն
Էժանագին բեմադրություն ՛՛Նրանց ուրույն ձեռագիրը՛՛
Արար առաջին. Գաղտնի գործակալներն ու տվյալ պահին ձեռքն ընկած տականքը մեկնում է ՛՛դեպքի վայր՛՛ աշխատանքի, այսինքն՝ ոգելից խմիչք օգտագործելու և հնարավորինս անկապ՝ բայց բարձրաձայն հայհոյելու:
Արար երկրորդ. Գաղտնի գործակալների բրիգադիրը այցելում է ՛՛դեպքի վայր՛՛ ստուգելու ենթակաների պրոֆեսիոնալիզմը և կազմում զեկույց:
Արար երրորդ. Հրեշտակները բերման են ենթարկում գործակալներին և մի քանի անմեղ մարդու, արձանագրություն կազմում, նոր հրահանգներ տալիս ու նորից ուղարկում ՛՛դեպքի վայր՛՛:
Արար չորրորդ. Մունետիկը ազդարարում է, թե ինչերի են ընդունակ Հրեշտակները, և հատկապես Հրեշտակապետը:
(շարունակելի)