Այսօր ԱԺ ֆինանսավարկային եւ բյուջետային հարցերի մշտական հանձնաժողովի նիստում քննարկվեց կառավարության ներկայացրած նոր վարկային համաձայնագիրը, որը կնքվել է Հայաստանի եւ Վերակառուցման եւ զարգացման միջազգային բանկի միջեւ:
Տրանսպորտի եւ կապի փոխնախարար Արթուր Առաքելյանը, ներկայացնելով «Կենսական նշանակության ճանապարհային ցանցի բարելավման ծրագրի համար լրացուցիչ ֆինանսավորում» կոչվող վարկային այդ համաձայնագիրը՝ նշեց, որ ծրագրի նպատակն է գյուղական համայնքները կապել միջպետական ճանապարհների հետ եւ այդ տարածքների բնակիչների համար ապահովել ելք դեպի հիմնական շուկա:
Նախկինում կառուցվել է շուրջ 170 կմ ճանապարհ: Փոխնախարարն ասաց, որ որակի եւ կատարողականի իմաստով ունեն փայլուն ցուցանիշներ, որոնք տվել է Համաշխարհային բանկը նաեւ:
Այդ 170 կմ-ից բացի՝ վարկային ծրագրի շարունակությունն է պետք, որի համար նոր վարկ են վերցնում 40 մլն ԱՄՆ դոլար: Կառավարությունը պարտավորություն է ստանձնում ֆինանսավորել հարկերը: Վարկի տոկոսը լողացող է. «Այս վարկը խիստ արտոնյալ է: Տոկոսը լողացող է, նախկինում կազմել է 0.3 տոկոս»:
Կարդացեք նաև
Առաջին փուլով նախատեսվում է 4 մարզում վերանորոգել 51.8 կմ ճանապարհահատված, որի մեջ են մտնում Շիրակի մարզում Մարալիկ, Քարաբերդ համայնքների ճանապարհները, Կոտայքի մարզում Հրազդանի ճանապարհը 3 կմ երկարությամբ, Սյունիքի մարզում նաեւ 4.6 կմ ճանապարհահատված, Մարտունի-Վարդաշեն-Վարդենիկ ճանապարհը 11 կմ երկարությամբ, միջպետական Մարտունի-Վարդենիկ ճանապարհի մի հատված նաեւ:
ՀՀԿ պատգամավոր Սուքիաս Ավետիսյանը հարցրեց՝ այդ 170 կմ-ը որ նորոգվել է, պայմանագրով քանի՞ տարի պետք է այդ ճանապարհը շինարարը պահպանի:
Արթուր Առաքելյանը պատասխանեց, որ գործում է մեկ տարվա երաշխիքային ժամկետ: Ճանապարհաշինարարը այդ մեկ տարվա ընթացքում պատասխանատու է բոլոր խնդիրների համար. «Մեկ տարին կրիտիկական ժամկետ է համարվում մեր բնակլիմայական պայմաններում, եւ այդ մեկ տարվա ընթացքում ի հատ են գալիս բոլոր թերությունները: Շինարարը այդ մեկ տարվա ընթացքում նորոգում է բոլոր ի հայտ եկած նորությունները:
Փոխնախարարն ասաց, որ հատուկ մեքենա են ձեռք բերելու, որը շրջելու է ճանապարհներով եւ արձանագրելու է փոսերի քանակը, ընդհանուր վիճակը եւ դրանից պարզ կլինի, թե որ ճանապարհի համար ինչքան ծախս պետք է արվի:
Հանձնաժողովի նիստին ներկա էին միայն ՀՀԿ պատգամավորները, ուստի միաձայն վարկային համաձայնագիրը հաստատեցին եւ ընդգրկվեց այն քառօրյա նիստերի օրակարգ:
Հռիփսիմե ՋԵԲԵՋՅԱՆ
