Քաղաքագետ Ալեքսանդր Մանասյանի համոզմամբ, ԵԽԽՎ-ում հայկական պատվիրակությունը ոչ թե դիվանագիտական աշխատանքով է զբաղված, այլ Ադրբեջանի քայլերին հետեւելու ու դրանք միայն քննարկելու գործով:
Նա «Հայելի» ակումբում այսօր հայկական կողմի ձախողումները պայմանավորեց վատ աշխատանքով. «Հետեւում ենք՝ Ադրբեջանն ինչ պետք է անի ու քննարկում ենք հենց միայն այդ հարցը: Բայց մենք չպետք է զբաղվենք Ադրբեջանի կեցվածքի, եվրոպական կառույցներում կաշառակերության դեպքերը քննարկելով, ինչը հիմա անում ենք, այլ մեր անելիքը պետք է լինի՝ նախապես վտանգը նկատելն ու այն չեզոքացնելը: Բայց մենք չունենք դիվանագիտության ճիշտ ըմբռնումը: Օրինակ չենք օգտվում ժողովրդական, շատ դեպքերում նաեւ խորհրդարանական դիվանագիտությունից»:
Քաղաքագետը տպավորություն ունի, որ Հայաստանը ԼՂՀ հիմնահարցի վերաբերյալ չունի ծրագիր, հայեցակարգ, ինչն էլ հանգեցնում է եվրոպական կառույցներում հայկական պատվիրակության պասիվ աշխատանքին.
«Մեր պատվիրակությունը չի տիրապետում ԼՂՀ հիմնահարցին, խորքային իմացություն չունի: Դրա համար էլ ճիշտ խոսք չեն կարող ասել,եթե մի անգամ էլ մի ճիշտ խոսք ասեն, դա կհնչի պատահաբար: Պետք է մասնագիտորեն տիրապետեն հարցին: Մշակեն ծրագիր՝ ինչ բանաձեւերով կամ ինչ կերպ կանխեն Ադրբեջանի ակտիվությունը: ԵԽԽՎ-ում մեր պատվիրակությունը պետք է իմանա այլ պատվիրակությունների անդամները ինչ են սիրում, ինչ դիրքորոշում, նախասիրություններ ունեն ու ինչ գաղափարների կրող են: Բայց հայկական կողմը իրադարձություններին միայն արձագանքող է, պետք է ունենա իր խաղի կանոնները:
Կարդացեք նաև
Չգիտեմ՝ արդյոք մեր խորհրդարանականները հրավիրել են մեր փորձագետներին խորհրդակցելու ԼՂՀ հիմնահարցի շուրջ, ոչ՝ չի եղել նման դեպք: Ինչու փորձագիտական համայնքի ու պատգամավորների միջեւ կապ չկա»:
Քաղաքագետի համար նշանակություն չունի, թե ԵԽԽՎ օրակարգում հայտնված երկու հակահայկական բանաձեւերն ինչ ճակատագիր կունենան. «Չեմ վախենում ընդունվելու հետեւանքներից, որովհետեւ ԼՂՀ հիմնահարցի վերաբերյալ միակ օրինական լիազորությունն ու մանդատն ունի Մինսկի խումբը: Այստեղ խնդիրը բանաձեւերի ընդունում-չընդունումը չէ, այլ այն, որ Ադրբեջանը ստեղծում է հիմնահարցի մի կերպար, որը մեզ համար ոչ բարենպաստ է ու որին մենք չենք հակադարձում»:
Արփինե ՍԻՄՈՆՅԱՆ
