«Մեր խմբակցությունում, մեր կուսակցությունում այդ ընտրություններին մասնակցելու, թեկնածություն առաջադրել-չառաջադրելու, մեկ ուրիշի առաջարկած թեկնածությանը սատարելու հարց չի քննարկվել: Կգա ժամանակը, քննարկումներ կլինեն, դուք էլ դրա մասին կիմանաք»,- խորհրդարանում լրագրողների հետ զրույցում ասաց ՀԱԿ խմբակցության պատգամավոր Գագիկ Ջհանգիրյանը`պատասխանելով ՄԻՊ-ի պաշտոնում իր թեկնածությանը վերաբերող հարցին:
Լրագրողների բոլոր ճշտող հարցերին`իրեն առաջարկ եղե՞լ է, իր սրտո՞վն է այդ պաշտոնը եւ այլն, Գագիկ Ջհանգիրյանը նույն պատասխանը տվեց`քննարկումներ կլինեն, արդյունքների մասին կիմանաք:
Aravot.am-ի հարցին`իր կարծիքով ինչո՞ւ հրաժարական տվեց Կարեն Անդրեասյանը, նա պատասխանեց. «Այդ հարցով դիմեք հրաժարական տված պաշտոնյային»:
Նա հրաժարվեց մեկնաբանել նաեւ Կարեն Անդրեասյանի դիմումի հիմնավորված լինելը, քանի որ շատերի կարծիքով՝ այն ոչ թե պատասխաններ տվեց, այլ հավելյալ հարցեր առաջացրեց: «Ես որեւէ մեկի որեւէ հայտարարություն չեմ մեկնաբանում: Հարցրեք իրենից: Հրաժարականի դիմումի մեկնաբանությունը ո՞րն է»,- ասաց նա:
Կարդացեք նաև
Կարեն Անդրեասյանի աշխատանքի իր գնահատականը, Գագիկ Ջհանգիրյանն ասաց, որ տվել է դեռ ՄԻՊ-ի`2014 թվականի գործունեության արդյունքների քննարկման ժամանակ: Այդ ժամանակ, հիշեցնենք, Գագիկ Ջհանգիրյանը խիստ քննադատեց Կարեն Անդրեասյանին` նշելով, որ «աչք չունի» ՄԻՊ-ի պաշտոնին: Նաեւ ասաց, որ վերջինս իր աշխատանքից հաճույք չի ստանում:
Լրագրողներից մեկի ուղիղ հարցին`ի վերջո, այդ պաշտոնում ձեզ տեսնո՞ւմ եք, Գագիկ Ջհանգիրյանը պատասխանեց. «Երիտասարդ, ես երբեք ինձ չէի տեսել կամ չէի տեսնում նույնիսկ ԱԺ պատգամավորի պաշտոնում, բայց տեսեք, ես հիմա ԱԺ պատգամավոր եմ: Էլի տարբեր դերերում չեմ տեսել, բայց կյանքը պարտադրել է: Լավ եղեք»:
Նելլի ԳՐԻԳՈՐՅԱՆ
