«Ինչպե՞ս կվարվեն պատգամավորները, չգիտեմ: Բայց խնդիրն այն չէ` այդ ձեւակերպումները Հայաստանին դու՞ր են գալիս, թե` ոչ: Հարցն այն է, որ սա վտանգում է 25 տարվա գործընթացը»,- այսօր լրագրողների հետ զրույցում ասել է ԱԺ «Ժառանգություն» խմբակցության պատգամավոր, նախկին արտգործնախարար Ալեքսանդր Արզումանյանը` խոսելով վաղը ԵԽԽՎ-ում երկու հակահայկական զեկույցների քվեարկության մասին:
Հիշեցնենք, դրանցից մեկը վերաբերում է ԼՂՀ հարցին, մյուսը` Սարսանգի ջրամբարին: Ի դեպ, մամուլում արդեն տեղեկություններ կան, որ այդ զեկույցները հնարավոր է վաղն ընդհանրապես քվեարկության չդրվեն: Հիշեցնենք, ԵԽԽՎ-ին` Մինսկի խմբի գործընթացին հավատարիմ մնալու կոչով դիմել էին ԵԱՀԿ Մինսկի խմբի համանախագահները, մի քանի օր առաջ ԵՄ-Հայաստան խորհրդարանական համագործակցության հանձնաժողովի նիստում էր բանաձեւ ընդունվել:
Պարոն Արզումանյանը հիշեցրեց, որ այս օրերի ընթացքում հայկական կողմը բավական ակտիվ աշխատել է, տարբեր այցելություններ, հանդիպումներ ու քննարկումներ են եղել. «Արդյունքները վաղը կտեսնենք` գնահատականներ կտանք, դասեր կքաղենք»:
ՀՅԴ խմբակցության քարտուղար Աղվան Վարդանյանն էլ նկատեց, որ գուցե որոշ ուշացումով, բայց Հայաստանն առաջին անգամ համակարգված աշխատանք է ծավալել` դիվանագիտական կորպուս, ընդդիմադիր եւ իշխանական պատգամավորներ եւ այլն: Այցելություններ են եղել Բելգիա, Շվեդիա, Նորվեգիա, Դանիա եւ այլն:
Կարդացեք նաև
Նրա համոզմամբ, անկախ վաղվա քվեարկության արդյունքներից՝ այս կատարված աշխատանքը ջուրը չի լցվի, եթե շարունակենք պահպանել ձեռք բերված հարաբերությունները, եւ հնարավորություն կտա հետագայում խուսափել նման իրավիճակներում հայտնվելուց: Նա չի կիսում ԵԽԽՎ-ի բանաձեւերի, զեկույցների խորհրդատվական բնույթը թերագնահատողների կարծիքը:
Անդրադառնալով արդեն Հայաստան-ԵՄ վերսկսված բանակցություններին եւ ստորագրվելիք նոր փաստաթղթին, Աղվան Վարդանյանը կարեւոր համարեց, որ մեր եվրոպացի գործընկերներն էլ տապալված բանակցային գործընթացից դասեր են քաղել եւ այժմ ընդունում են`Հայաստանն ունի պարտավորություններ ԵԱՏՄ-ի առջեւ, Հայաստան-ԵՄ նոր հարաբերություններում դա էլ պետք է հաշվի առնվի: «Ես չեմ կարծում, որ այս նոր փաստաթղթում խոչընդոտների կհանդիպենք»:
Նելլի ԳՐԻԳՈՐՅԱՆ
