«Արդեն բոլորիս համար պարզ է, որ Հայաստանում անկախ դատարան գոյություն չունի»,- հունվարի 25-ին Վերաքննիչ քրեական դատարանի դիմաց տեղի ունեցած բողոքի ակցիայից հետո լրագրողների հետ զրույցում ասաց «Նոր Հայաստան» հանրային փրկության ճակատի անդամ Ժիրայր Սեֆիլյանը:
Հիշեցնենք, որ Վերաքննիչ քրեական դատարանը հունվարի 25-ին մերժեց առաջին ատյանի դատարանի՝ որպես խափանման միջոց Գեւորգ Սաֆարյանի նկատմամբ կալանք նշանակալու որոշումը բողոքարկող միջնորդությունը: Այդ կապակցությամբ մի խումբ քաղաքացիներ հավաքվել էին դատարանի դիմաց:
Ժիրայր Սեֆիլյանն ասաց, որ եթե նույնիսկ դատարանը դրական որոշում կայացներ, դա դատարանի շնորհքը չէր լինի, այլ պետք է լիներ քաղաքական որոշում. «Գեւորգին ձերբակալել են քաղաքական դրդապատճառներով, դուրս գալն էլ լինելու է քաղաքական որոշում, չեմ կասկածում ես: Միաժամանակ համոզված եմ, որ մինչ օրս, որ Գեւորգին բաց չեն թողել, սրա դիմաց շատ թանկ են վճարելու: Այսինքն՝ այս հիմարները, նկատի ունեմ այս համակարգը, եթե իրենք կարծում են, որ Հյուսիսային Կորեայի ռեսուրսն ունեն, չարաչար սխալվում են»:
Նա նշեց, որ կարծում է, որ ձերբակալությունները պետք է շարունակություն ունենան, միայն Գեւորգ Սաֆարյանով չպիտի սահմանափակվեն. «Ինչ-ինչ պատճառներով չկարողացան ձերբակալությունները շարունակեն, թե ինչու Գեւորգը, պարզ է: Գեւորգը երիտասարդների շրջանում սիմվոլ էր, Գեւորգն ինքը գլխավոր ոգեւորողներից էր, բնականաբար, պետք է սկսեին ամենաշատ ոգեւորողից: Եթե չվախեցող Գեւորգին կարողանում են բռնել, մեկուսացնել, շատ երիտասարդներ, իրենց կարծիքով զգույշ կլինեն, զուսպ կլինեն, չեն միանա դեկտեմբերի 1-ից սկսված շարժմանը»:
Կարդացեք նաև
Ամի ՉԻՉԱԿՅԱՆ
