Այսօր ԱԺ Մարդու իրավունքների եւ հանրային հարցերի մշտական հանձնաժողովում քննարկվեց կառավարության նախագիծը՝ փոփոխություններ կատարելու «Հասարակական կազմակերպությունների» մասին օրենքում:
Հանձնաժողովի նախագահ Էլինար Վարդանյանը արդարադատության փոխնախարար Սուրեն Քրմոյանին հարցրեց՝ օրենքում նշված է կամավոր սկզբունքով աշխատելու մասին, կամավոր ասելով ի՞նչ եք հասկանում: Քրմոյանը պարզաբանեց, որ կամավոր սկզբունքն այն է, երբ մարդը գնում է աշխատելու՝ առանց որեւէ վարձատրության: Եթե կամավորի աշխատանքը գերազանցում է անընդմեջ 5 օրը, նա պետք է վարձատրվի, իր հետ պետք է պայմանագիր կնքվի. «Եթե շաբաթը մեկ գալիս ինչ-որ գործ է անում ազատ ժամանակ, չենք կանոնակարգում»:
Ալեքսանդր Արզումանյանը հարցրեց՝ եթե ես գալիս եմ ամեն ուրբաթ ու աշխատում եմ 3 ժամ, չպե՞տք է վարձատրվեմ: Քրմոյանը պատասխանեց, որ «այդ պարագայում պայմանագիր կնքելու պահանջ չենք դրել: Եթե գնում եք կոնկրետ պրոյեկտով, այդ դեպում պայմանագիր է պետք»:
Էլինար Վարդանյանը նաեւ հարցրեց՝ նախագծում կա ձեւակերպում, որ ՀԿ-ների գործունեությունը կասեցվում է, եթե կա օրենքի կոպիտ խախտում, էական խախտում եւ կեղծիք, ի՞նչ եք հասկանում կեղծիք ասելով: Քրմոյանը պատասխանեց, որ եթե կեղծ փաստաթղթեր է ՀԿ-ն ներկայացրել, կեղծիք եզրույթի տակ է ընդգրկվում:
Կարդացեք նաև
Պատասխանատվություն է նախատեսվում, եթե ՀԿ-ի կողմից կանոնադրությանը անհամապատասխան գործունեություն են ծավալում: Էլինար Վարդանյանի խոսքերով՝ ՀԿ-ների կանոնադրության մեջ շատ ընդգրկուն են ձեւակերպումները՝ ժողովրդավարության հաստատմանն ուղղված գործունեություն, ինչպե՞ս եք ստուգելու, սուբյեկտիվ մոտեցում չի՞ առաջացնելու:
Քրմոյանն էլ պատասխանեց, որ ՀԿ-ներ կան, որ ստեղծվում են երեխաներ իրավունքների պաշտպանության շուրջ, հետո ֆինանսի համար մասնակցում են դատապարտյալների խնդրով:
Զարուհի Փոստանջյանը հեգնեց՝ կամ էլ ընտրություններով:
Նախագիծը դրվեց քվեարկության, ձեռնպահ քվեարկեց միան Զարուհի Փոստանջյանը:
Հռիփսիմե ՋԵԲԵՋՅԱՆ
