Գյումրու «Ռադիո Մարիամ Հայաստան»-ի աշխատանքները համակարգող 30-ամյա լրագրող Լիլիթ Թորոսյանն այսօր ազատ է արձակվել, նախաքննական մարմինը կալանքի ժամկետի ավարտին փոխել է նրա խափանման միջոցը՝ ստորագրություն վերցնելով երկրից չհեռանալու մասին:
Այս փաստն անչափ ուրախացրել է Լիլիթ Թորոսյանի գյուղի՝ Արեւիկի բնակիչներին, որոնք ի սկզբանե հայտարարել էին, որ չեն հավատում, թե նրա պես կիրթ ու հավասարակշռված աղջիկը կարող է որեւէ կապ ունենալ Արթուր Վարդանյանի գլխավորած զինված խմբի հետ:
Արեւիկի գյուղապետ Գարեգին Ստեփանյանն Aravot.am-ին ասաց. «Լիլիթի ազատ արձակվելու մասին լրատվամիջոցներից եմ տեղեկացել, նա գյուղ դեռ չի եկել, չեմ տեսել, չեմ զրուցել հետը, հարազատներն էլ ամենայն հավանականությամբ գնացել են նրան դիմավորելու»:
Հիշեցնենք, որ Լիլիթ Թորոսյանին «Ռադիո Մարիամ Հայաստան»-ի Գյումրու մասնաճյուղի հիմնադիր Հայր Անտոն Ծայրագույն Վարդապետ Թութունջյանի հետ միասին ձերբակալել էին նոյեմբերի 25-ին, երբ ԱԱԾ-ն Ղորղանյան 83 հասցեում գտնվող ռադիոկայանում կատարել էին խուզարկություններ ու առգրավվել էր լրատվամիջոցի համակարգիչները:
Կարդացեք նաև
Aravot.am-ը փորձեց ճշտել, թե փոխվե՞լ է արդյոք Հայ Անտոնի խափանման միջոցը. նա 71 տարեկան է, առողջական որոշակի խնդիրներ ունի, նրա խնամքին 96-ամյա մայրն է: Մենք կապ հաստատեցինք փաստաբան Լեւոն Բաղդասարյանի հետ, որը ի սկզբանե պաշտպանում էր վարդապետի շահերը: Նա տեղեկացրեց, որ այլեւս այս անձի շահերը չի պաշտպանում: Թե ո՞վ է հիմա պաշտպանում Հայ Անտոնի շահերը, մեզ չհաջողվեց ճշտել անգամ «Ռադիո Մարիամ Հայաստան»-ի գրասենյակից:
Հայր Անտոնի մոր խնամակալը՝ տիկին Սաթենիկը մեր հեռախոսազանգերին տեւական ժամանակ է չի պատասխանում, չեն պատասխանում նաեւ «Ռադիո Մարիամ Հայաստան»-ի պաշտոնական կայքում տեղադրված հեռախոսահամարներին. թե՛ քաղաքային եւ թե՛ բջջային:
Նունե ԱՐԵՎՇԱՏՅԱՆ
