Կյանքի դժվարություններն ու բարդությունները արվեստով հաղթահարելու կարողությունը` նկարչուհի-մոդելավորող Սիրանուշ Նազանյանը ձեռք է բերել հայրենի բնությունից: Երկու տարեկանում ծնողները նկատել են, որ Սիրանուշը շեշտված գույներով` հստակ դիմանկարներ ու գծապատկերներ է նկարում: Նկարչուհին արդեն երեք տասնամյակ է` իր գործերում սիրտ ու հոգի է դնում, իսկ ապագան տեսնում` իր գույների նման վառ պատկերներով լի:
Արմավիրի մարզում` Էջմիածնում, ապրող և ստեղծագործող Սիրանուշ Նազանյանը Aravot.am-ի հետ զրույցում ասաց. «Յուրաքանչյուր մարդ ինքն է նկարում իր կյանքի նկարը: Իմ կյանքի նկարը արվեստն է : Արվեստը անսահմանափակ, տիեզերական ներդաշնակություն հաղորդող մի ուժ է, որը մարդուն դարձնում է ավելի բարի, հոգեպես գեղեցիկ, ազնիվ ու մաքուր: Իսկ այս գաղափարները իմ կենսակերպն են դարձել շատ վաղուց»:
Նկարչուհի- մոդելավորողը, խոսելով իր ընտրած ճանապարհի մասին՝ ասաց, որ մարդ կարող է ընտրել ցանկացած ճանապարհ, սակայն պետք է զգալ քեզ հոգեհարազատը: «Կյանքում մշտապես ինձ համար առաջնային է եղել ազնվությունը: Եթե արդար ես, ուրեմն ճանապարհդ էլ ազնիվ կլինի, և միշտ արդար` առաջընթացդ: Իմ նկարներում ազգային էլեմենտներն ու խորհրդանիշներն անպակաս են: Անվերջ ստեղծելու, մարդկանց հոգևոր արժեհամակարգը զարգացնելու իմ փորձերը տվել են որոշակի արդյունք»:
Սիրանուշ Նազանյանը, բացի նկարելուց, իր կյանքի երկու կարևոր ստեղծագործություններին է դաստիարակում:
Կարդացեք նաև
Խոսելով իր համագործակցությունների, ապագայի պլանների և ընտանիքի մասին՝ ասաց, որ բազմաթիվ համագործակցություններ և ցուցահանդեսներ է ունեցել ինչպես Էջմիածնում, այնպես էլ Երևանում: «Ես ցանկանում եմ, որ հայ կանայք չկորցնեն հայուհու կերպարը, և իրենց հագուստների և զարդերի մեջ ունենան ազգային էլեմենտներ: Իսկ այն, որ ընտանիքս ինձ երբեք չի խանգարել՝ ես բազմիցս եմ խոսել: Իմ կյանքի երկու հրաշքները միշտ օգնել են գնահատել ունեցածս: Նրանց դրական էներգիան ինձ ուժ է տալիս նկարելու և ապագաս ճիշտ պլանավորելու համար»:
Հայկ ՄԱԳՈՅԱՆ
