«Բարձր եմ գնահատում այդ փաաստաթուղթը, քանի որ այն միայն պառլամենտական չէ, քանի որ կողմերից բարձրաստիճան պաշտոնյաներ են մասնակցել քննարկումներին»,- «Հայք» վերլուծական կենտրոնում, խոսելով ԵՄ-Հայաստան խորհրդարանական հանձնաժողովի օրերս ընդունած հայտարարության մասին, ասաց «Գլոբալիզացիայի եւ տարածաշրջանային համագործակցություն» հասարակական կազմակերպության ղեկավար, քաղաքագետ Ստեփան Գրիգորյանը:
ԵՄ-Հայաստան խորհրդարանական համագործակցության հանձնաժողովի 16-րդ նիստի ավարտին, հիշեցնենք, ընդունվեց համատեղ հայտարարություն`16 կետից բաղկացած, որում, մասնավորաբար, ԵԽԽՎ-ին կոչ է արվում համահունչ մնալ ԼՂՀ հարցում Մինսկի խմբի շրջանակում ընթացող գործընթացներին, հայ-թուրքական հարաբերություններին վերաբերվող երկու կետ կա, որոնցում առաջին անգամ խոսվում է Հայաստան-Թուրքիա սահմանի միակողմանի փակ լինելու մասին, խոսվում է այն մասին, որ Հայաստանում բավական մեծ թվով սիրիահայ փախստականներ կան եւ Հայաստանին պետք է լրացուցիչ գումարներ տրամադրել:
Փաստաթղթում ԵՄ-Հայաստան այդպես էլ չստորագրված Ասոցացման համաձայնագրից կետեր կան: Ստեփան Գրիգորյանի կարծիքով, դա անդրադարձ կունենա ԵՄ-Հայաստան դեկտեմբերի 7-ին վերսկսված բանակցությունների եւ ստորագրվելիք վերջնական փաստաթղթի վրա: Նա գտնում է, որ ԵՄ-Հայաստան խորհրդարանական հանձնաժողովի հայտարարությունը դրական ազդեցություն կարող է ունենալ նաեւ ԵԽԽՎ-ում կայանալիք քննարկումների վրա:
Հիշեցնենք, հունվարի 25-ին Ստրասբուրգում կմեկնարկի Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանը: Oրակարգում ներառված է երկու հակահայկական զեկույց` «Բռնության աճը Լեռնային Ղարաբաղում ու Ադրբեջանի մյուս օկուպացված տարածքներում» եւ «Ադրբեջանի սահմանային բնակչությունը միտումնավոր զրկված է ջրից» վերնագրերով: Մեկը՝ ԼՂՀ-ի, մյուսը Սարսանգի ջրամբարի վերաբերյալ:
Կարդացեք նաև
Ստեփան Գրիգորյանը գտնում է, որ ԵԽԽՎ-ում քննարկման մեկնարկին, մեր պատվիրակության անդամները, իսկ ավելի լավ կլինի այլ պետությունների պատգամավորների միջոցով բարձրաձայնվի դա: Երեկ ԵԽԽՎ-ին, Մինսկի խմբի գործընթացին հավատարիմ մնալու կոչով դիմել էին նաեւ Մինսկի խմբի համանախագահները: Դա, ըստ քաղաքագետի, նույնպես պետք է բարձրաձայնել քննարկումների ժամանակ: «Քիչ հավանական է, բայց որ Թուրքիայի պատգամավորներից մեկին համոզեն`շատ ավելի լավ կլինի»,- ասաց նա:
ԵՄ-Հայաստան խորհրդարանական հանձնաժողովի բանաձեւում խոսվում է նաեւ կողմերի միջեւ փոխվստահության մթնոլորտ ստեղծելու մասին: Այդ կետը, քաղաքագետը խորհուրդ է տալիս օգտագործել այսպես. «Սարսանգի ջրամբարի վերանորոգման հարցը համատեղ մարդասիրական գործընթացի վերածելու համար: ԵՄ-ն էլ սիրով կֆինանսավորվի: Դա կուտվի շատ պատգամավորների կողմից, նույնիսկ կիսակաշառված, եթե այդպիսիք կան»
Փաստաթղթում եվրոպական երկրներին կոչ է արվում`ճանաչել Ցեղասպանությունը: «Լավ է Թուրքիայի հետ աշխատել, բայց մենք տեսնում ենք Թուրքիայի դիրքորոշումը»,- ասաց Ստեփան Գրիգորյանը`ընդհանուր առմամբ Հայաստան-ԵՄ խորհրդարանական հանձնաժողովի բանաձեւը մեզ համար դրական գնահատելով:
Նման դրական արդյունքը քաղաքագետը պայմանավորում է երկու հանգամանքով`մեր պատվիրակության լավ աշխատանքը եւ Թուրքիայում ու Ադրբեջանում մարդու իրավունքների վատթարացող վիճակը. «Իրենք հասկացան, որ Հայաստանը բավական կայուն գործընկեր է»:
Նելլի ԳՐԻԳՈՐՅԱՆ
