«Մենք` որպես «Գազպրոմի» 100 տոկոսանոց դուստր ընկերություն, պարտավոր ենք անխափան գազամատակարարում ապահովել Հայաստանին և անում ենք դա: Իսկ Հայաստանը գազ կստանա վրացակա՞ն գազատարով, թե՞ իրանական, շարքային սպառողի համար դա չպետք է նշանակություն չունենա, որովհետև դրանից էապես ոչինչ չի փոխվելու»,- 168.am-ի հետ զրույցում ասել է «Գազպրոմ-Արմենիա» ընկերության վարչության նախագահ-գլխավոր տնօրեն Վարդան Հարությունյանը: Խոսելով Վրաստանի տարածքով Հայաստան մատակարարվող գազի տարանցման խնդիրների մասին՝ Վ. Հարությունյանը նշել է, որ այսօր վրացական տարանցման արժեքն աշխարհում գործող ամենաթանկ գինն է (10 տոկոս)։
Նա ասել է, որ այսօր «Գազպրոմի» համար ընդունելի չէ 10 տոկոս վճարել տարանցման համար, և դրա համար, իհարկե, պետք է բանակցություններ տարվեն, քանի որ այդ տարանցման արժեքը մտած է ՀՀ ներքին սակագնի մեջ, և մեր սպառողները պիտի հասկանան՝ տարանցման գումարի նվազումը ուղիղ ազդեցություն է ունենալու սահմանի գնի վրա: «Անկախ այդ բանակցությունների արդյունքից՝ մենք գազամատակարարման խնդիր չենք ունենա։ Հայաստանի ամբողջ պահանջարկը կարելի է իրանական գազատարով բավարարել։ Չի կարելի հայտարարություններ անել, թե Հայաստանի գազամատակարարումը վտանգված է և արհեստական խուճապ ստեղծել»,- ասել է Վ. Հարությունյանը։
Բաբկեն ԹՈՒՆՅԱՆ
Հրապարակումն ամբողջությամբ՝ «168 Ժամ» թերթի այսօրվա տպագիր համարում:
