Այսօր ի պաշտպանություն կալանավորված ակտիվիստ Գեւորգ Սաֆարյանի՝ «Նոր Հայաստան» նախաձեռնության մի խումբ անդամներ երթ էին կազմակերպել Ազատության հրապարակից դեպի ՀՀ ոստիկանություն: Նրանք պահանջում են ազատ արձակել Սաֆարյանին եւ կարճել նրա նկատմամբ հարուցված քրեական գործը: Ցուցարարների պահանջներից է նաեւ պատասխանատվության ենթարկել ոստիկան Գեղամ Խաչատրյանին, որը սոցցանցերում ակտիվիստների հասցեին վիրավորական գրառումներ է կատարել:
![IMG_5883[1]](https://www.aravot.am/wp-content/uploads/2016/01/IMG_58831.gif)
Ոստիկանության շենքի մոտ ակտիվիստներին մոտեցավ Ոստիկանության լրատվության եւ հասարակայնության հետ կապերի վարչության պետ Աշոտ Ահարոնյանը: Ակտիվիստ Լեւոն Զաքարյանն Աշոտ Ահարոնյանին հարցրեց, թե Գեւորգ Սաֆարյանի հետ կապված ինչ ընթացքում է նախաքննությունը եւ պատժվելու է արդյոք Գեղամ Խաչատրյանը:
Կարդացեք նաև
«Գեղամ Խաչատրյանի գործով մեզ մոտ ծառայողական քննություն է նշանակված: Եթե ոստիկանի գործողությունների վերաբերյալ այլ տեղ նույն փաստով քրեական գործ կա հարուցված, կասեցվում է ժամանակավորապես: Տվյալ դեպքում այս գործը քննում է Հատուկ քննչական ծառայությունը»,- պատասխանեց Աշոտ Ահարոնյանը:
Ակտիվիստներն հետաքրքրվեցին, թե ինչու է այդ դեպքում Գեւորգ Սաֆարյանը կալանավորված, իսկ Գեղամ Խաչատրյանը, որն, ըստ տեսագրությունների, հարվածել է քաղաքացիներին՝ ոչ: «Սաֆարյանի գործողությունների հետ կապված գրություն է եղել, կատարվել են համապատասխան արարողակարգեր: Իսկ ՀՔԾ դիմել են ոստիկանի հետ կապված: Հարուցվել է քրեական գործ, պետք է սպասենք»:
Անդրադառնալով Գեղամ Խաչատրյանի գրառումներին՝ Աշոտ Ահարոնյանն ասաց, որ այդ հարցը քննության առարկա կդառնա: «Ծառայողական քննությունը հիմա կասեցվել է քրեական գործի պատճառով: Գեղամ Խաչատրյանի գործողություններին կարող ենք անդրադառնալ, երբ քննությունը որոշակի արդյունքներ կունենա: Համոզված եղեք նրա գործողությունները քննության առարկա կդառնան»:
Աշոտ Ահարոնյանի հեռանալուց հետո Լեւոն Զաքարյանը լրագրողների հետ զրույցում նշեց, որ իրենց չեն բավարարվում հնչած պարզաբանումները: «Պապիկին ապտակած ոստիկանի նկատմամբ պատիժ չի կիրառվել արդեն մի քանի ամիս է: Դա ինձ համար հիմք է մտածել, որ այդ մարդիկ չեն պատժվի: Միգուցե կարծում են, որ հանրությունը կմոռանա այդ մասին, ինչպես եղել է մի քանի անգամ»:
Ցուցարարներն այժմ շարժվում են դեպի Գլխավոր դատախազություն, որտեղ նախատեսում են շարունակել ցույցը:
Աշոտ ԻՍՐԱԵԼՅԱՆ
