Հայաստանում ֆրանսիական համալսարանն այսօր հյուրընկալել էր Ֆրանսիայի արտաքին գործերի և միջազգային զարգացման նախարարին առընթեր զարգացման և ֆրանկոֆոնիայի պետքարտուղար Անիկ Ժիրարդենին:
«Մարդկությունն այսօր կանգնած է մի շարք խնդիրների ու մարտահրավերների առջև, ինչպիսին է, օրինակ, ահաբեկչությունը: Ֆրանսիան պայքարում է դրա դեմ, բայց այն հաղթահարելու համար բոլորս պետք է միասին լինենք: Ֆրանկոֆոն տարածքը համերաշխության, երկխոսության տարածք է»,- ուսանողների հետ հանդիպման ընթացքում ընդգծեց պետքարտուղարը:
Այն նաև մշակութային տարածք է, որտեղ կարևոր նշանակություն ունի բազմալեզվությունը. «Ֆրանկոֆոնիան միայն Ֆրանսիայով չի սահմանափակվում: Այն մի մեծ տարածք է՝ իր կենտրոններով, որոնցից մեկը Հայաստանն է, և որի հետ մենք առանձնահատուկ հարաբերություններ ունենք»,- նշեց Անիկ Ժիրարդենը:
Դառնալով Հայաստանում ֆրանսերենի նկատմամբ հետաքրքրությանը՝ նա ուրախությամբ նկատեց, որ այստեղ մոտ քառասուն հազար ուսանողներ և աշակերտներ են սովորում ֆրանսերեն. «Սա ցույց է տալիս, թե ինչքան են հայերը հրապուրված ֆրանսերենով: Անշուշտ, այս դժվարին ժամանակներում աշխարհին բաց լինելը շատ կարևոր է»,- նշեց Անիկ Ժիրարդենը:
Կարդացեք նաև
Ուսանողներից մեկի հարց-դիտարկմանը, թե զարգացման ինչ հեռանկարներ ունի այսօր ֆրանկոֆոնիան, երբ անգլերենն այդքան մեծ տարածում ունի, նա պատասխանեց, որ այսօր մոտ 750 միլիոն մարդ տիրապետում է ֆրանսերենին, իսկ այդ թիվը բավականին հուսադրող է. «Սակայն ավելին պետք է արվի ֆրանսերենի ուսուցման զարգացման ուղղությամբ»,- ընդգծեց նա:
Սիրանուշ ՀԱՅՐԱՊԵՏՅԱՆ
