Հայկական բարեգործական ընդհանուր միությունում այսօր ամփոփվեց Բրիտանական խորհրդի` 2013թ. մեկնարկած «IDEAS ներառական որոշումներ հավասար եւ հաշվետու հասարակության համար» ծրագիրը, որի նպատակն է՝ տեղական ինքնակառավարման մարմիններում որոշումներ ընդունելիս ներգրավել նաեւ հաշմանդամություն ունեցողների տեսակետը:
Միացյալ թագավորության փորձագետների աջակցությամբ՝ Արթիկ քաղաքի այգին եւ մշակույթի տունը հարմարեցվել են հաշմանդամություն ունեցողների կարիքներին: Քաղաքապետարանի եւ Բրիտանական խորհրդի ջանքերով Արթիկում կառուցվել են թեքահարթակներ:
Հաշմանդամություն ունեցողների համար կատարվող այս աշխատանքները մեծապես կարեւորեց Հայաստանում ԵՄ պատվիրակության ղեկավար, դեսպան Պյոտր Անտոնի Սվիտալսկին: «Հայաստանն առաջընթաց է գրանցել, հուսով եմ՝ առաջիկայում այստեղ նույնպես կվերանա այն կարծրատիպը, թե հաշմանդամություն ունեցողները հասարակության լիարժեք անդամներ չեն»,-ասաց նա:
Ազգությամբ լեհ դեսպանը պատմեց, որ կյանքի մեծ մասն անցկացրել է սոցիալիստական ճնշման ներքո՝ հատկապես սովետական կարգերի ժամանակ. «Վաղ տարիքից հիշում եմ, որ Լեհաստանում եւ Սովետական միությունում փողոցում հաշմանդամություն ունեցողի տեսնելը գրեթե անհնար էր: 1980-ականներին գնացի Հոլանդիա եւ տեսա փողոցում անվասայլակներով տեղաշարժվող մարդկանց: Հարցրեցի՝ ինչպե՞ս կբացատրեն այս տարբերությունը: Պատասխանեցին, որ կատարյալ հասարակություններում չեն սիրում ոչ կատարյալ մարդկանց: Հետեւաբար, այս ծրագիրը չի վերաբերում միայն նրան, որ հաշմանդամություն ունեցողներին հնարավորություն տանք հասարակության լիարժեք անդամ զգալու: Հիմնական նպատակն է՝ հասարակության այդ վատ կարծրատիպից ձերբազատվելը»:
Կարդացեք նաև
Պյոտր Անտոնի Սվիտալսկին նշեց, որ Լեհաստանում վերջին 20 տարում հաջողվել է կոտրել այդ կարծրատիպը. «Շատ մարդիկ սովոր են, որ, օրինակ, Գերմանիայի ֆինանսների նախարարն անվասայլակով է: Եւ դրա մասին չեն խոսում որպես արտասովոր երեւույթի, այլ նորմալ են վերաբերվում»:
Լուիզա ՍՈՒՔԻԱՍՅԱՆ
“Ազգությամբ լեհ դեսպանը պատմեց, որ կյանքի մեծ մասն անցկացրել է սոցիալիստական ճնշման ներքո ” –
խեղճ մարդ:
էտքան ճնշվելուց հետո տես էս ոնց ա կազդուրվել ազատ ու անկախ Եվրամիության ու ՆԱՏՕ-ի կազմում: 😀