«Ինչ զարգացում էլ լինի, դա նպաստելու է Հայաստանի տնտեսական զարգացումներին»,- «Տեսակետ» մամուլի ակումբում պատասխանելով Aravot.am-ի հարցին`ասաց «Կովկաս» ինստիտուտի փոխտնօրեն Սերգեյ Մինասյանը: Քաղաքագետից հետաքրքրվել էինք`ի՞նչ զարգացումներ են հնարավոր իրանական գազը Հայաստանի տարածքով Վրաստան տեղափոխելու հարցում, մանավանդ, եթե ՌԴ-ն չի ցանկանում զիջել դիրքերը եւ Վրաստանին վերջնագրեր է ներկայացնում:
Հայաստանի տարածքով անցնող գազատարը, հիշեցնենք, պատկանում է «Գազպրոմին»:
«Եթե չորս երկրների ձևաչափը հաջողվի`կավելանա Հայաստանի էներգետիկ անվտանգությունը»,- կարծում է քաղաքագետը`նկատի ունենալով տակավին վերջերս Հայաստանի, Վրաստանի եւ Իրանի ներկայացուցիչների ստորագրած համաձայնությունը, որին նաեւ ՌԴ-ի ներկայացուցիչն էր մասնակցում:
«Վրաստանն էլ բավական շահագրգռված է այս գործընթացում, քանի որ Ադրբեջանն ի վիճակի չէ մատակարարել Վրաստանին անհրաժեշտ գազի քանակը: Վրաստանը պիտի փորձի «Գազպրոմի» հետ բանակցային գործընթացի մեջ մտնել, ինչը նաեւ ռուս-վրացական քաղաքական հարաբերություններում լարվածությունը կթուլացնի»,- ասաց Սերգեյ Մինասյանը:
Հայաստանի համար գազի գնի նվազեցման հարցը, ինչի համար ՀՀ կառավարությունը դիմել է ՌԴ կառավարությանը, ըստ քաղաքագետի՝ հնարավոր է «փաթեթով» լուծվի այս համաձայնությունների համատեքստում: «Ընդհանուր քաղաքական տեսանկյունից, ես, բացի դրականից՝ այլ միտում չեմ տեսնում»,- ասաց նա:
Սերգեյ Մինասյանը կարծում է, որ անգամ Իրանի նկատմամբ պատժամիջոցների պարագայում Իրանն ու Հայաստանը հասան համագործակցության հնարավոր մակարդակի`նկատի ունենալով մեր տնտեսության հնարավորությունները. «Տնտեսական բումեր պետք չէ սպասել: Իսկ քաղաքական առումով, Իրանի նկատմամբ պատժամիջոցների վերացումը դրական է Հայաստանի համար`մենք հակասություններ չենք ունեցել, ԼՂՀ հարցում Իրանի դիրքորոշումը պրոհայկական է, թուրքական, սիրիական, ռուսական գործոններն իրենց դերը խաղում են»:
Նելլի ԳՐԻԳՈՐՅԱՆ
