«Նորավանք» գիտակրթական հիմնադրամի ղեկավար Գագիկ Հարությունյանի մեկնաբանմամբ, Իրանի նկատմամբ պատժամիջոցների կասեցմամբ, աշխարհը 2015-ին հրաժեշտ տվեց միակենտրոն համակարգին:
Ըստ նրա, դեռ 2010-ին ամերիկացի տեսաբանները կանխատեսում էին, որ Իրանը կդառնա կարեւորագույն երկիր, իսկ այսօր դա արդեն իրողություն է:
«Իրանը ինքնավար քաղաքականություն է միշտ վարել ու այսօր էլ փորձում է շարունակել: Իրանը հիմա երկու տարբեր իրավիճակներում է հայտնվել. մի կողմից ազատվեց ամերիկյան պատժամիջոցներից, մյուս կողմից՝ հայտնվեց արաբական երկրների, մասնավորապես՝ Սաուդյան Արաբիայի հետ կապված զարգացումներում: Այսօր սաստկացել են հայտարարություններն այն մասին, որ կարող է ստեղծվել ազատ առեւտրի գոտի Իրանի հետ, բայց պետք է զգուշավոր լինենք մեր կանխատեսումներում, որովհետեւ այսօրվա ցանկացած տնտեսական հաջողություն հնարավոր է, եթե սեփական տնտեսությունը զարգացած է»,- այսօր «Անդրադարձ» ակումբում ասաց Գագիկ Հարությունյանը:
Ըստ նրա, Իրանի հետ Հայաստանը պետք է գիտատար արտադրությամբ հանդես գա, թանկ ապրանքներով, որովհետեւ միայն գյուղատնտեսական ապրանքներով ու հումք արտահանելով մեծ հաջողությունների չենք հասնի. « Նույնը վերաբերում է ԵՏՄ հետ հարաբերություններին, այս կառույցում նույնպես չենք կարողանում տեղավորվել, թեեւ մեծ շուկա է բացվել»:
Կարդացեք նաև
Անդրադառնալով ԵԽԽՎ նստաշրջանի օրակարգում հայտնված երկու հակահայկական բանաձեւերին՝ պարոն Հարությունյանը կարծիք հայտնեց, որ այդ տիպի բանաձեւերը մեծ նշանակություն չունեն աշխարհում. «էապես նվազել է այդ կազմակերպության քաշը: Սահմանային լարվածության աճը կամ նվազումը կապված չէ այդ բանաձեւերի հետ: Չեմ կարծում, որ այդ բանաձեւերը որեւէ ազդեցություն կունենան: Ադրբեջանը փորձելու է այս տարի իրեն ավելի համեստ պահել, որովհետեւ էապես փոխվել են ՌԴ- Թուրքիա հարաբերությունները»:
Արփինե ՍԻՄՈՆՅԱՆ
