«Թե ասա` ջահել աղջիկ ես, մազերդ ինչի՞ ես բոքս կտրել». «Հարսնացուն հյուսիսից» ֆիլմի հերոսուհու նման Գերմանիայի փողոցներում անընդհատ ուզում էինք նկատողություն անել վարսերը մանուշակագույն, կապույտ ու վարդագույն ներկած դպրոցական փոքր երեխաներին, որոնք Եվրոպայի բազմազանության մեջ փորձում են ինչ-որ կերպ ինքնատիպ երեւալ ու առանձնանալ:
Նեղսրտել էինք, երբ մետրոյում մանկապարտեզի երեխաներին զբոսանքի տանող դաստիարակչուհու դեմքին էինք նայել՝ մի քանի կգ-անոց պիրսինգներով, ծխախոտը բերանին, ծաղկավոր մազերով: Բայց այս ամենից զատ՝ տարօրինակ էր տեսնել, թե ինչպես են գերմանացիները երեխաներին հարմարեցնում իրենց՝ կպցնելով մի քանի ամսական երեխային իրենց հեծանիվներին, տեղադրելով նրանց արկղերի մեջ ու թափառելով տոնավաճառներով:
Մի քանի ամսական երեխայի ձեռքին տեսնում էինք չիպս ու չուպա-չուպս, մայրը տվել էր ձեռքն ու սայլակն առել, ընկել շուկաները: Իսկ մյուս լուսանկարում, որն արվել է Լայպցիգում, հայրը քնած երեխային վզին դրած՝ ժամերով խանութներում ման էր գալիս:
Լուսանկարները՝ ՀՌԻՓՍԻՄԵ ՋԵԲԵՋՅԱՆԻ
Կարդացեք նաև
«Առավոտ» օրաթերթ
21.01.2016
