«Կոալիցիայում ամենակարեւոր պահը պատասխանատվությունն է, որ պետք է բոլոր քաղաքական ուժերը իրենց մոտ զգան՝ նախքան իրավունքներից օգտվելը: Մեր քաղաքական անցած ճանապարհը հուշում է, որ մեծ ուշադրություն պետք է դարձվի պատասխանատվության բարձրացման վրա»,- «Առավոտի» հետ զրույցում, խոսելով ՀՅԴ-ի հետ հնարավոր համագործակցության մասին, ՀՀԿ-ի հետ կոալիցիա կազմելու թիվ մեկ կանոնը հրապարակեց ՀՀԿ խմբակցության քարտուղար Գագիկ Մելիքյանը:
Նա ասաց, որ անցյալից դասեր են քաղել եւ էլ թույլ չեն տալու, որ իրենց հետ կոալիցիա կազմեն, իրենց իրավունքներից՝ «կարկանդակից» օգտվեն ու հեռանան՝ չկիսելով որեւէ պատասխանատվություն. «Իրավունքներից բոլորը կարող են օգտվել, պատասխանատվությունից խուսափել բոլորին չէ, որ կհաջողվի այս պարագայում: Ցանկացած քաղաքական ուժ միշտ կոալիցիայից դուրս գալու ճանապարհին մտածում է խուսափել պատասխանատվությունից՝ օգտված լինելով իրավունքներից: Ովքեր դուրս են եկել, ասել են, թե իբր իշխող քաղաքական ուժը այդ լծակներն իրենց չի վերապահել, բայց դա իրականությունից շատ հեռու է: Այս անգամ կոալիցիա մտնելու առաջին նախապայմանը հենց դա պետք է լինի՝ պատասխանատվություն վերցնելը: Բոլորս պետք է դաս քաղենք»:
«Առավոտ» օրաթերթ
21.01.2016
