«Չկա մասսայական ավելի մեծ թիմ, քան ՀԱԿ-ն է: Մեզ մոտ կան բազմաթիվ վառ անհատականություններ, Կոնգրեսն ունի բազմաթիվ հանձնաժողովներ, որոնք աշխատում են տարբեր ուղղություններով՝ տնտեսական, արտաքին, տեղական ինքնակառավարման մարմիններ, առողջապահություն: Իրականում ինստիտուցիոնալ բառը եթե հասկանանք ընդդիմություն, որն ունի համապատասխան կառույցներ եւ ինստիտուցիոնալ կերպով աշխատում է՝ փորձելով վերլուծել ամբողջ կառավարման համակարգը եւ այլընտրանքային լուծում է փորձում առաջարկել՝ դա այսօր ՀԱԿ-ն է»,- Aravot.am-ի հետ զրույցում ՀԱԿ խմբակցության ղեկավար Լեւոն Զուրաբյանն այսպես պատասխանեց մեր հարցին, թե ինստիտուցիոնալ ընդդիմություն ասվածը ՀՀ-ում իրատեսական համարո՞ւմ եք, երբ քաղաքական թիմ լինի, ոչ թե լիդերներ, որի ծնկները ամեն պահի կարող են ծալվել իշխանության ճնշումների առաջ, ունենան համակարգված ծրագիր, ինստիտուտներ, մի ընտրատեղամասում լինեն 3 վստահված անձինք, որոնցից եթե մեկը ծախվի, երկրորդն ընկրկի, երրորդը քվե կպահի:
Լեւոն Զուրաբյանի խոսքերով՝ «Եթե մի թիմ կա, որտեղ բացի լիդերից կան նաեւ այլ բազմաթիվ լիդերներ, բազմակարծություն, ընդ որում մարդիկ, որոնք երեւացող են հասարակության համար, դա ՀԱԿ-ն է: Համեմատեք, որտե՞ղ կան հանրությանը հայտնի քաղաքական լիդերների այդպիսի բազմազանություն, ինչքան կա Կոնգրեսում»:
Հռիփսիմե ՋԵԲԵՋՅԱՆ
