Արդեն սկսվել են Սահմանադրական փոփոխություններին հաջորդած կարեւոր փուլը՝ Ընտրական օրենսգրքի մշակման քննարկումները: Որոշ քաղաքական ուժեր ներկայացրել են իրենց առաջարկությունները: Մասնավորապես, «Լուսավոր Հայաստանն» առաջարկել է կիրառել Ղրղզստանի փորձը եւ մարդկանց տրամադրել կենսաչափական քարտեր ու ընտրատեղամասում ներդնել էլեկտրոնային քվեատուփ, որն ավտոմատ ամեն ինչ հաշվարկում է: ԲՀԿ-ն նույնպես առաջարկել է ընտրել էլեկտրոնային քվեարկության տարբերակը:
Այսօր Aravot.am-ը Կենտրոնական ընտրական հանձնաժողովի նախագահ Տիգրան Մուկուչյանին հարցրեց, թե ի՞նչ կարծիք ունի քաղաքական ուժերի ներկայացրած այդ առաջարկների մասին:
Նա պատասխանեց. «Ընտրական օրենսգրքից, ոչնչից ես տեղյակ չեմ, ոչ մի բանի չեմ մասնակցում: Մենք ապաքաղաքական մարմին ենք, չենք մասնակցում որեւէ քննարկման: Ես ծանոթ չեմ այդ առաջարկներին, ո՞նց կարող եմ կարծիք ներկայացնել: Մենք «Ընտրական օրենսգրքի» հետ կապ չունենք, մենք կիրառող մարմին ենք»:
Հռիփսիմե ՋԵԲԵՋՅԱՆ
