«Գեւորգի եւ Հայկի նկատմամբ խտրական վերաբերմունք է ցուցաբերվում կալանավայրում: Մենք որոշեցինք նմանատիպ ակցիաների միջոցով նրանց աջակցության փորձ անել»,- այս մասին «Ա1+»-ի եւ Aravot.am-ի հետ զրույցում ասաց «Նոր Հայաստան» նախաձեռնության անդամ Գագիկ Եղիազարյանը:
Նա նշեց, որ «Նոր Հայաստանը» որոշել է համոզել, ստիպել, խնդրել միջազգային կառույցների ներկայացուցիչներին եւ դիվանագիտական կազմակերպությունների ներկայացուցիչներին իրենց արձագանքը տալ այս երեւույթի առնչությամբ:
«Նոր Հայաստանի» անդամները նամակներ հանձնեցին Ֆրանսիայի, Ռուսաստանի դեսպանատներ եւ ՄԱԿ-ի ներկայացուցչությանը: Նամակով նրանք բարձրաձայնում են Գեւորգ Սաֆարյանի եւ Հայկ Կյուրեղյանի նկատմամբ «վերջերս տեղի ունեցող ոտնձգությունների հարցը»:
Օրվա ընթացքում «Նոր Հայաստանը» նախատեսում է նամակներ հանձնել նաեւ Գերմանիայի եւ Անգլիայի դեսպանատներին ու Եվրամիության եւ ԵԱՀԿ-ի գրասենյակներին:
Կարդացեք նաև
«Նոր Հայաստանի» աջակից Ներսես Գեւորգյանը Aravot.am-ի հետ զրույցում անդրադառնալով իրենց հետագա քայլերին ասաց, որ հունվարի 22-ին նախատեսում են հանրահավաք անցկացնել. «Այնուհետեւ ծրագրվում է երթ անել: Իրազեկման համար ենք փորձելու երթ անել: Քանի գնալու է՝ ռեժիմը հասկանալու է, որ ոստիկանական ուժն օգտագործելու հնարավորությունն իր մոտ սահմանափակ է»:
Ներսես Գեւորգյանը նշեց, որ Հայաստանի իշխանություններին այժմ գումար է հարկավոր, որը Ռուսաստանը չի կարող տրամադրել. «Իրենց Արեւմուտքը փող կտա: Հետեւաբար իրենք մարդու իրավունքների հարցում ստիպված են ենթարկվել Արեւմուտքի պահանջներին: Բայց այդ պահանջներին ենթարկվելու հարցում իրենք պարտավոր են ՀՀ ոստիկանությունը համապատասխանեցնել Արեւմուտքի չափանիշներին»:
Ըստ նրա՝ այդ պատճառով է, որ ոստիկանական ուժեր օգտագործելու փոխարեն իշխանությունները սկսել են քրեական պատասխանատվության ենթարկել ակտիվիստներին:
Ի տարբերություն այլ կառույցների, Ռուսաստանի դեսպանատնից հրաժարվեցին վերցնել «Նոր Հայաստանի» նամակը: «Սա խոսում է Ռուսաստանի բռնակալական ձգտումների, նրանց քաղաքակրթության մասին: Ցանկացած իշխանափոխություն այստեղ բախվելու է հակառուսականության խնդրին: Նոր իշխանությունները փորձելու են Ռուսաստանի իշխանությունն այստեղ նվազեցնել եւ դա ձեռնտու չէ վերջինիս»:
Աշոտ ԻՍՐԱԵԼՅԱՆ
