Այսօր Կառավարության շենքի դիմաց ցույց անող «Նաիրիտի» նախկին աշխատակիցներին միացել էր նաեւ գործարանի նախկին գլխավոր տնօրեն Կարեն Իսրայելյանը: Նա լրագրողների հետ զրույցում հերքեց գործարանի հետ կապված Համաշխարհային բանկի եզրակացությունը:
«Ազգային ժողովում գտնվում են հերքման հետ կապված արդյունքները: Գործարանի ղեկավարությունը նույնպես գրել է, որ համամիտ չեն Համաշխարհային բանկի եզրակացության հետ: Գործարար մարդիկ տեսնում են, որ Համաշխարհային բանկի տված եզրակացությունը պատվեր է»,- հայտարարեց Կարեն Իսրայելյանը:
Նախկին տնօրենը չմասնավորեցրեց, թե ով է տվել այդ պատվերը: «Համաշխարհային բանկը ո՞ւմ ագենտն է: Աշխարհում ում պետք է՝ իրենք կարողանում են խեղճացնել, դարձնել սպասարկող պետություն»:
Կարեն Իսրայելյանը տեղեկացրեց, որ Միջպետական բանկը «Նաիրիտի» դեմ տոկոսների հետ կապված էր դիմել դատարան եւ շահել էր 60 միլիոն դոլար. «Այժմ տեղեկացել ենք, որ պարտքերը զիջվել է Հայաստանի կառավարության բաժնետոմս ունեցող «Նաիրիտ 2» եւ «Հայգազարդ» ընկերություններին: Հիմնական հույսը դա է, հիմնական պարտքը դա է, բոլորը դրանից էին անհանգստանում, որեւէ ներդրող դրա համար չէր գալիս: 250 միլիոնի կարգի գումար էր: Եթե պարտքը զիջվել էր, պետք է հասկանալ պայմանները: Եթե կառավարությունը որեւէ պարտավորություն չի ունենա բանկի նկատմամբ՝ դա շատ լավ կլինի եւ կխթանի ներդրումները»:
Գործարանի նախկին գլխավոր տնօրենը հորդորում է չդադարեցնել պայքարը. «Տեսեք՝ աշխատավարձերի համար պայքարեցինք եղավ: Հիմա բոլորի նպատակն այն է, որն գործարանն աշխատի»:
Աշոտ ԻՍՐԱԵԼՅԱՆ
