Դանակահարություններ Երևանում և Թումանյանում

Հունվարի 16-ին, ժամը 16.10-ին, շտապօգնության խումբը Երևանի Բագրատունյաց փողոցում գտնվող ռեստորանային համալիրի մոտից, «կրծքավանդակի ձախ շրջանի կտրած արյունահոսող վերք» ախտորոշմամբ, հիվանդանոց է տեղափոխել 1965 թ. ծնված Վաղարշակ Ա.-ին:

Ոստիկանության Երևան քաղաքի վարչության և Շենգավիթի բաժնի ծառայողները Շենգավիթի քննչական բաժնի հետ համատեղ ձեռնարկած միջոցառումների շնորհիվ պարզել են, որ հունվարի 16-ին, ժամը 15.00-ի սահմաններում, Չեխովի փողոցի թիվ 16 շենքի բակում, 1983 թ. ծնված Արման Ք.-ն դանակով հարվածել և վնասվածքներ է պատճառել Վաղարշակ Ա.-ին:

Ըստ բժշկի տեղեկանքի` Վաղարշակ Ա.-ն ի վիճակի չի եղել հաղորդում տալու:

Ոստիկանության ծառայողների ձեռնարկած օպերատիվ-հետախուզական միջոցառումների շնորհիվ, պարզվել է, որ վիճաբանության ժամանակ վնասվածքը Վաղարշակ Ա.-ին դանակով հարվածել և պատճառել է 1986 թ. ծնված Էդվարդ Հ.-ն, ում հունվարի 17-ին, ժամը 12.30-ին, իրենց տան մոտից բերման են ենթարկել:

Էդվարդ Հ.-ն խոստովանական ցուցմունք է տվել և ներկայացրել հանցագործության գործիք դանակը:

Էդվարդ Հ.-ն ձերբակալված է:

Նույն օրը Երևանի Արարատյան փողոցի տներից մեկից բերման է ենթարկվել Արման Ք.-ն:

Քննությունը շարունակվում է:

***

Հունվարի 16-ին, ժամը 23.35-ին, հիվանդանոցից ոստիկանության Թումանյանի բաժնում հաղորդում է ստացվել, որ «կրծքավանդակի ձախ կեսի և ձախ բազկի կտրած-ծակած արյունահոսող վերքեր» ախտորոշմամբ իրենց մոտ է տեղափոխվել 1985 թ. ծնված Հրաչ Մ.-ն, իսկ «կրծքավանդակի ձախ կեսի կտրած-ծակած արյունահոսող վերք» ախտորոշմամբ` 1960 թ. ծնված Ռոբերտ Հ.-ն:

Ձեռնարկված օպերատիվ-հետախուզական միջոցառումների և բացատրական աշխատանքների շնորհիվ՝ նույն օրը, ժամը 13.40-ին, 1981 թ. ծնված Արման Բ.-ն նշված հանցագործությունը կատարելու համար մեղայականով ներկայացել է բաժին:

Ձեռնարկված օպերատիվ-հետախուզական և քննչական գործողությունների արդյունքում պարզվել է, որ հունվարի 16-ին, ժամը 23.00-ի սահմաններում, 5-րդ փողոցի սկզբնամասում Արման Բ.-ն, վիճաբանության ժամանակ, սուր կտրող-ծակող գործիքով հարվածներ է հասցրել Հրաչ Մ.-ին ու Ռոբերտ Հ.-ին:

Փաստի առթիվ ՀՀ քրեական օրենսգրքի 112 հոդվածի 1-ին մասի հատկանիշներով հարուցվել է քրեական գործ:

Արման Բ.-ն ձերբակալված է:

Քննությունը շարունակվում է:

ՀՀ ոստիկանություն