Մոլդովայի «Արժանապատվություն եւ ճշմարտություն» աջակենտրոն շարժման կողմնակիցները շարունակում են գրոհել այդ երկրի խորհրդարանի շենքը: Ոստիկանները դժվարությամբ են կարողանում շարժման կողմնակիցներին զսպել: Վերջիններս կոչ են անում Մոլդովան միացնել Ռումինիային. հաղորդում է «Sputnik»-ի մոլդովական ծառայությունը:
Ցուցարարները շարունակում են ոստիկաններից խլել սաղավարտները եւ վահանները: Քիչ առաջ Ոստիկանությունն արցունքաբեր գազ է կիրառել ցուցարարների դեմ: Մի քանի իրավապահների ինքնազգացողությունը վատացել եւ նրանք լքել են խորհրդարանի շենքը:
Սոցիալիստների կուսակցության եւ «Մեր կուսակցության» ղեկավարները կոչ են անում ցուցարարներին, որոնց հաջողվել է մտնել Խորհրդարանի շենք, տեղափոխվել հրապարակ:
«Մեր կուսակցության» ղեկավար Ռենատո Ուսատին հայտարարել է, որ իմաստ չունի գրոհել խորհրդարանի շենքը, քանի որ «բոլոր պատգամավորներին եւ նախարարներին ոստիկանական համազգեստով արդեն հեռացրել են շենքից»:
Կարդացեք նաև
Նշված է, որ սեպտեմբերից Քիշնեւում շարունակվող ցույցերն այսօր թեժացել են, որովհետեւ այսօր խորհրդարանն ընտրել է նոր կառավարություն: Վարչապետ է նշանակվել Պավլ Ֆիլիպը:
Տեղի բնակիչները պնդում են, որ Ֆիլիպի կառավարությունը կազմվել է օլիգարխ Վլադիմիր Պլախոտնյուկի ազդեցությամբ, որն, իբրեւ, «գնել» է խորհրդարանական մեծամասնությունը (101-ից 56 ձայն): Պլախոտնյուկն ինքը նույնպես փորձել է վարչապետ դառնալ, սակայն նրա թեկնածությունը չի ընդունել երկրի նախագահ Նիկոլայ Տիմոֆտին:
Պատրաստեց Աշոտ ԻՍՐԱԵԼՅԱՆԸ
