Արամի 30 հասցեում գտնվող շենքն այլեւս չկա: Այն գիշերով քանդվել է. քաղաքապետարանի մեկնաբանությամբ՝ Արամի եւ Աբովյան փողոցների մայթերը ընդլայնելու նպատակով:
Տարածքի սեփականատեր «ԱՎՈ ՖՄՀ» ՍՊԸ-ի տնօրեն Ավեդիս Կարագուլյանն է, քաղաքաշինական ծրագիրը նախագծող, ճարտարապետը Աշոտ Ալեքսանյանը: Վերջինս մամուլում ասել էր, թե շենքը բարի նպատակով է ոչնչացվել՝ Երեւանը տրանսպորտային սթրեսից փրկելու համար:
Aravot.am-ը ազգագրագետ Հրանուշ Խառատյանից հետաքրքրվեց՝ ինչպես է գնահատում Արամի 30 հասցեում գտնվող շենքը քարուքանդ անելու վերաբերյալ, ընդհանրապես Հին Երեւանը ջնջելու մոլուցքը:
Կարդացեք նաև
«Այսօրվա Երևանը ուրարտական շրջանը վկայող 2800-ամյա անցյալի և դեռևս անհասկանալի ներկայի՝ միմյանց հետ ոչնչով չկապված գոյություններ են: Պատկերացնենք մի տարեց մարդու, որի ձեռքին կա իր ծննդյան վկայականը, որից հետո՝ հայելի, որին նայում է տարեց մարդը և չգիտի՝ ինքը ով է: Ծննդյան վկայականում կա անուն-ազգանուն, հետո՝ դատարկություն է, չկա կենսագրություն, չկա անձնագիր, չկա աշխատանքային գրքույկ, չկա հիշողություն, չկա ոչ մշակութային, ոչ նյութական ժառանգություն, չկա իր կենսագրության որևէ հաստատում: Մարդուն ասել են, որ սա՛ է քո ծննդյան վկայականը, և մարդն անընդհատ բազմացնում է այդ ծննդյան վկայականը՝ իր անձի գոյությունը հաստատելու համար: Այդ մարդու մնացած բոլոր փաստաթղթերը վերացրել են, իրենից խլել են և արխիվներից հանել ոչնչացրել են հիմքերը»,-դիպուկ ներկայացրեց ազգագրագետը:
Տիկին Խառատյանի եւ այլ կարծիքների մասին մանրամասն՝ վաղվա տպագիր «Առավոտում»:
Գոհար ՀԱԿՈԲՅԱՆ
